Siljanovska-Davkova para Rutes: Korridoret 8 dhe 10 janë drejtime strategjike për mobilitetin ushtarak të NATO-s

Presidentja Gordana Siljanovska-Davkova, në kuadër të vizitës së punës në Bruksel, zhvilloi një takim me Sekretarin e Përgjithshëm të NATO-s, Mark Rutte.

Siljanovska-Davkova rikonfirmoi përkushtimin e shtetit maqedonas ndaj NATO-s dhe mbrojtjes kolektive, duke theksuar se uniteti aleat dhe lidhja e fortë transatlantike janë parakushte themelore për sigurinë e aleatëve.

Ajo konfirmoi përcaktimin për arritjen e objektivit të ndarjeve buxhetore në përputhje me Planin e Hagës, duke theksuar se vendi investon vazhdimisht në modernizimin e Armatës, rezistencën kibernetike, teknologjitë e reja dhe mbrojtjen e infrastrukturës kritike.

Për të, Korridoret 8 dhe 10 nuk janë vetëm projekte infrastrukturore, por drejtime strategjike që lidhin bashkëpunimin rajonal me interesat e sigurisë së NATO-s dhe Bashkimit Evropian, veçanërisht në kontekstin e mobilitetit ushtarak.

Siljanovska-Davkova shprehu kënaqësi për certifikimin e Grupit të Lehtë Këmbësorik Batalional si të gatshëm për luftim, duke e vlerësuar këtë si konfirmim të profesionalizmit dhe aftësisë së Armatës për të kontribuar në operacionet e udhëhequra nga NATO, BE dhe OKB.

Duke iu referuar përvojës nga anëtarësimi në NATO, ajo theksoi se përmbushja e standardeve të larta aleate duhet të shërbejë si shembull për zbatimin konsekuent të kritereve të Kopenhagës në procesin e integrimit evropian.

Presidentja ritheksoi mbështetjen për Ukrainën dhe nevojën për vazhdimin e ndihmës politike, ushtarake, financiare dhe humanitare, si shprehje e solidaritetit aleat.

Sipas saj, paqja gjithëpërfshirëse, e drejtë dhe e qëndrueshme duhet të mbështetet në të drejtën ndërkombëtare dhe Kartën e Kombeve të Bashkuara, ndërsa konsekuenca në respektimin e këtyre parimeve është e pandashme nga respektimi i rendit ndërkombëtar.