Trump mes negociatave dhe luftës, pritet vendimi për sulmet ndaj Iranit

Presidenti i SHBA-së, Donald Trump, tha mbrëmë se së shpejti do të vendosë nëse do ta vazhdojë luftën kundër Iranit, një konflikt që SHBA-ja dhe Izraeli e nisën në shkurt, me qëllim parandalimin e Teheranit nga zhvillimi i armëve bërthamore.

Ai tha se po shqyrton nëse do t’i vazhdojë sulmet për të siguruar që programi bërthamor i Iranit të ndalet përgjithmonë. Trump theksoi se dëshiron të shmangë shkatërrime të mëtejshme në Iran, por nuk e përjashtoi mundësinë e sulmeve të tjera.

„Do ta zbuloni së shpejti“, tha Trump.

Pas një takimi me këshilltarët për sigurinë kombëtare, Trump theksoi se Shtetet e Bashkuara i kanë arritur të gjitha objektivat e tyre në Iran dhe se tani do të përcaktojnë hapat e mëtejshëm.

Portali amerikan Axios, duke cituar një zyrtar të administratës amerikane, raportoi se Komanda Qendrore e SHBA-së (CENTCOM) po intensifikon përgatitjet për një rifillim të mundshëm të operacioneve ushtarake në shkallë të gjerë në Iran, megjithëse ende nuk ka marrë urdhra të rinj nga Uashingtoni.

Ndërmjetësit e kanë vizituar Teheranin disa herë gjatë ditëve të fundit, ndërsa vetë Trump ka folur së fundmi për përparim të mundshëm në negociatat që synojnë përfundimin e konfliktit.