Të punësuarit në Ministrinë e Kulturës në protestë, kërkojnë rritje të pagave

Punonjësit e Ministrisë së Kulturës, Administratës për Mbrojtjen e Trashëgimisë Kulturore dhe Agjencisë së Filmit janë mbledhur sot në një protestë para Ministrisë së Financave, duke shprehur pakënaqësi për të ardhurat e tyre mujore.

Kryetari i Organizatës sindikale në Ministrinë e Kulturës Branko Kostovski, tha se pagat e pothuajse 70 për qind të të punësuarve në këto tri institucione janë nën pagën mesatare në vend, ndërsa diferenca me pagat e të punësuar në pozita të njëjta në institucionet nga lëmia e kulturës është 10 mijë denarë.

Ai shtoi se organizata sindikale në varësi të Ministrisë së Kulturës tashmë ka përgatitur draft tekstin e kontratës kolektive, e cila parasheh rritje objektive dhe korrekte të pagave të punëtorëve, për të cilën Ministria e Financave ka dhënë opinion negativ vitin e kaluar. Por, pas vetëm pak ditësh, siç përmendi ai, Ligji për Buxhetin vendosi rritje të pagave prej 30 për qind për punonjësit e Ministrisë së Financave.

“E mirëpresim rritjen e pagave të kolegëve tanë nga Ministria e Financave, por njëkohësisht kërkojmë nga Ministri i Financave, Qeveria dhe Kryeministri që të mos lejojnë trajtim të pabarabartë të punonjësve të organeve shtetërore. Ne inkurajojmë kolegët tanë në ministritë e tjera që të na bashkohen dhe të luftojmë së bashku për atë që na takon. Kemi përkrahje nga menaxhmenti, nga personat përgjegjës në Ministrinë e Kulturës dhe do të vazhdojmë të kërkojmë rritje të pagave përmes rrugës institucionale”, tha Kostovski.