Gërkovska-Saenz: Vazhdon mbështetja e UN Women për forcimin e lidershipit femëror në luftën kundër korrupsionit

Falënderim për mbështetjen e përgjithshme nga UN Women për aktivitetet e Kabinetit për politika të qeverisjes së mirë, veçanërisht në lidhje me politikat kundër korrupsionit dhe forcimin e rolit të gruas në luftën kundër dukurive negative në shoqëri, shprehu zëvendëskryeministrja Sllavica Gërkovska në takimin e sotëm me Elisa Fernandez Saenz, zëvendësdrejtoreshë rajonale e UN Women për Evropë dhe Azinë Qendrore, ku mori pjesë edhe udhëheqësja e zyrës së kësaj organizate në vend, Vesna Ivanoviq Kastared.

Gërkovska theksoi se është e rëndësishme që politikat që krijohen të jenë afatgjate dhe të qëndrueshme, sepse vetëm në këtë mënyrë mund të arrihen rezultate të dukshme dhe efikase.

“Zëvendëskryeministrja theksoi kontributin e madh të Zyrës së UN Women në Maqedoninë e Veriut në themelimin e Forumit të Grave Lidere nga EJL për qeverisje të mirë dhe antikorrupsion, si nismë rajonale për rrjetëzimin e grave dhe të rinjve nga rajoni, shkëmbim të përvojave dhe mbështetjes reciproke në përpjekjet për të ndërtuar një shoqëri më të mirë për të gjithë, duke inkorporuar parimet e barazisë, integritetit dhe përgjegjësisë”, informojnë nga Kabineti i zëvendëskryeministres për Politika të Qeverisjes së mirë.

Saenz e përshëndeti nismën e zëvendëskryeministres Gërkovska, duke theksuar se është shumë ide e mirë të formohet rrjeti i grave me qëndrime të ngjashme, përkatësisht të ndërtohet masë kritike e lidershipit të grave që çon përpara. Të dy bashkëbisedueset u dakorduan ta thellojnë bashkëpunimin rreth kësaj nisme dhe ta lidhin me rrjete të ngjashme në botë, me qëllim që të forcohet dhe t’i jepet shikueshmëri dhe vëllim më i madh gjithë procesit.

“Ato ranë dakord se është e rëndësishme të krijohen politika dhe rregullore ligjore në drejtim të përparimit të pozitës së grave në të gjitha fushat e shoqërisë, por që gjithashtu është e rëndësishme të krijohen mekanizma efikas që do ta ndjekin implementimin e politikave të miratuara”, thonë nga Kabineti i zëvendëskryeministres.

Gërkovska dhe Saenz e hapën edhe çështjen e korrupsionit në sport nga aspekti gjinor dhe u pajtuan rreth bashkëpunimit të mëtejshëm në tema ndërsektoriale ku lidhen barazia gjinore, të rinjtë dhe korrupsioni, sepse, siç u theksua në takim, gratë dhe të rinjtë janë bartës të ndryshimeve dhe zhvillimit shoqëror.