Trump: Do të vendos tarifa për mallrat nga BE-ja dhe Kina
Presidenti amerikan Donald Trump ka deklaruar se do të vendosë tarifa për Bashkimin Evropian për të adresuar, sipas tij, praktikat e padrejta tregtare dhe suficitin e madh tregtar që BE-ja ka me SHBA-në. Sipas Trump-it, tarifat janë një mjet i domosdoshëm për të vendosur drejtësi në marrëdhëniet tregtare.
Trump deklaroi se po shqyrton vendosjen e një tarife prej 10% për importin e mallrave kineze duke filluar nga 1 shkurti. Në deklaratat e mëparshme për gazetarët në Shtëpinë e Bardhë, ai e arsyetoi këtë masë duke pretenduar se Kina po dërgon fentanil në SHBA përmes Meksikës dhe Kanadasë. Këto deklarata pasuan kërcënimet e Trump-it për vendosjen e tarifave prej 25% për importet nga Meksika dhe Kanadaja.
I pyetur nga gazetarët në Shtëpinë e Bardhë nëse planifikon të vendosë një tarifë universale për të gjitha produktet e importuara në SHBA, Trump u përgjigj se ende nuk janë të gatshëm për këtë, por mund të jenë në të ardhmen. Për tarifat ndaj Kanadasë dhe Meksikës, ai tha se po shqyrton një tarifë prej 25%, duke pretenduar se këto dy vende lejojnë hyrjen e një numri të madh njerëzish në SHBA, si dhe trafikimin e fentanilit. Trump gjithashtu theksoi se dëshiron të ndryshojë deficitin tregtar të SHBA-së me Bashkimin Evropian përmes tarifave ose rritjes së eksportit të energjisë.
Tarifat ishin një temë kryesore gjatë ditës së inaugurimit, ku Trump theksoi se masa të tilla mund të sjellin të ardhura të mëdha për vendin, ndërsa administrata e tij përpiqet të rigjallërojë industrinë amerikane. Tarifat do të mblidhen nga një agjenci e re e quajtur Shërbimi i të Ardhurave të Jashtme. Në SHBA, IRS (Internal Revenue Service) njihet si Shërbimi i të Ardhurave të Brendshme.
“Tarifat do të na bëjnë të mallkuarisht të pasur. Kjo do të rikthejë kompanitë amerikane që na kanë braktisur,” u tha Trump mbështetësve të tij në Uashington.
Tarifat e gjera ishin një nga premtimet kryesore të fushatës së Trump-it. Megjithatë, analistët besojnë se kjo ka të ngjarë të çojë në çmime më të larta për amerikanët dhe në probleme për kompanitë e prekura nga kundërpërgjigjet e vendeve të tjera.
Trump nuk i vendosi menjëherë tarifat siç kishte premtuar më parë, por deklaroi se po shqyrton vendosjen e një tarife prej 25% për importet nga Kanadaja dhe Meksika më 1 shkurt, për shkak të emigrantëve të paligjshëm që hyjnë në SHBA dhe trafikut të fentanilit. Pas betimit si president, Trump nuk i zbatoi menjëherë tarifat ndaj dy fqinjëve të SHBA-së, por urdhëroi agjencitë federale të hetojnë deficitet tregtare të vazhdueshme, praktikat e padrejta tregtare dhe manipulimet e mundshme me valutën nga vende të tjera.
