Kushtet e Trump për OBSH/ Rishikon tërheqjen nëse organizata reformohet dhe ka një drejtues amerikan

Donald Trump po konsideron një mundësi për të mos i tërhequr Shtetet e Bashkuara nga Organizata Botërore e Shëndetësisë.

Megjithatë presidenti amerikan ka disa kushte. Sipas agjencisë së lajmeve Reuters, administrata e Trump ka marrë në konsideratë një plan për reforma në OBSH, duke përfshirë vendosjen e një amerikani në krye.

Dokumenti, i ndarë me këshilltarët e Presidentit Donald Trump përpara inaugurimit të tij më 20 janar, rekomandoi që Shtetet e Bashkuara të njoftojnë shpejt tërheqjen e tyre nga OBSH dhe të miratojnë një qasje të re radikale për t’u marrë me agjencinë, me synimin që një amerikan të marrë drejtimin, sapo të përfundojë mandati i Tedros Gebriesus në vitin 2027.

I përpiluar nga një ekspert i politikës së jashtme me kërkesë të ekipit të tranzicionit të Trump, propozimi përfundon se OBSH është bërë “agjencia më kaotike, më pak efektive e OKB”.

OBSH ka dështuar të zbatojë reformat e propozuara gjatë dy dekadave të fundit, duke ëuar në një përkeqësim të menaxhimit dhe ekspertizës shkencore, thuhet në dokument.

Megjithëse më tej pranohet se largimi nga OBSH-ja do të dëmtonte interesat amerikane, dokumenti argumenton se e njëjta gjë vlen edhe në rast se SHBA qëndron në organizatë nëse ajo nuk reformohet.

Në rast se SHBA tërhiqet, agjencia e OKB do të humbiste financuesin më të madh.

Në urdhrin e tij Trump akuzon OBSH për keqpërdorimin e pandemisë së COVID-19 dhe ka kërkuar një spastrim të agjencisë në mënyrë që SHBA të rikthehet, por nuk ka dhënë detaje specifike.