Trump deklaroi se do të takohet me Putinin në Arabinë Saudite për të përfunduar luftën në Ukrainë

Donald Trump deklaroi se mund të takohet me Vladimir Putinin në Arabinë Saudite në të ardhmen e afërt, pas një bisede telefonike që zhvilluan dje, gjatë të cilës ranë dakord të fillojnë menjëherë bisedimet për paqen për Ukrainën. Kremlini konfirmoi bisedën dhe shtoi se Putini e ftoi Trumpin në Moskë, duke thënë se ka ardhur koha për të punuar së bashku.

“Do të takohemi në Arabinë Saudite. Është koha të përfundojë kjo luftë qesharake, e cila ka sjellë kaq shumë vdekje dhe shkatërrim,” tha Trump, duke e paralajmëruar Ukrainën që të mos presë rikthimin e kufijve të saj para vitit 2014.

Trump dhe Sekretari amerikan i Mbrojtjes, Pit Hegset, gjithashtu hodhën poshtë mundësinë që Ukraina të bëhet anëtare e NATO-s.

Presidenti ukrainas, Volodymyr Zelensky, tha se ka biseduar me Trump për “paqe të qëndrueshme dhe afatgjatë”. Ai do të takohet nesër me nënpresidentin amerikan, Jay D. Vance, dhe sekretarin e shtetit, Marco Rubio, gjatë Konferencës për Siguri të Mynihut.

“Asnjë nuk dëshiron paqe më shumë se Ukraina. U dakorduam që të mbajmë kontakt dhe të planifikojmë takime të ardhshme,” tha Zelensky pas një bisede telefonike njëorëshe me Trumpin.

Një grup i fuqishëm i shteteve europiane, përfshirë Britaninë e Madhe, Gjermaninë dhe Francën, publikoi se ata gjithashtu duhet të kenë një vend në tryezën e bisedimeve për çdo negociatë lidhur me të ardhmen e Ukrainës.

“Jemi të gatshëm të forcojmë mbështetje tonë për Ukrainën. Jemi të angazhuar për pavarësinë, sovranitetin dhe integritetin e saj territorial. E ndajmë qëllimin për të mbështetur Ukrainën derisa të arrihet një paqe e qëndrueshme, të drejtë dhe gjithëpërfshirëse. Ukrainës duhet t’i ofrohen garanci të forta sigurie,” thanë ministrat e Jashtëm të shtatë shteteve evropiane pas një takimi në Paris.