Studentët e Universitetit të Tetovës realizuan vizitë studimore në Austri

Studentët e njësive të ndryshme akademike të Universitetit të Tetovës, prej 23 deri më 31 mars 2025, të shoqëruar nga udhëheqësi i Njësisë për çështje normative, Mr. Florian Nesimi, realizuan vizitë studimore në Vjenë, në kuadër të programit YDDAP (Demokracia te të rinjtë dhe kampanjat digjitale), organizuar nga Asociacioni Ndërkombëtar i Studentëve për Paqe (IAYSP).
Në kuadër të këtij programi studentët Olti Esati, Rrezearta Samiu, Fjolla Jahiu, Amra Zendeli dhe Gert Salihi vizituan institucionet kryesore të Austrisë, si Parlamentin e Austrisë, selinë e Kombeve të Bashkuara dhe Kryqin e Kuq të Austrisë. Gjatë këtyre vizitave studentët për së afërmi u njoftuan me mënyrën e organizimit dhe funksionimit të këtyre institucioneve, me sistemin zgjedhor austriak, historikun dhe funksionimin e institucioneve ndërkombëtare dhe mënyrën e punës së Kryqit të Kuq.
Gjatë këtij qëndrimi studimor, studentët e Universitetit të Tetovës përfituan njohuri të reja mbi demokracinë dhe mënyrën se si të rinjtë duhet më tepër të jenë të angazhuar në aktivitete të ndryshme të jetës publike. Pjesë shumë e rëndësishme e këtij qëndrimi njëjavor ishte edhe fitimi i përvojave të reja në krijimin dhe shpërndarjen e kampanjave digjitale në rrjetet sociale.
Pjesë e programit të sipërpërmendur, përveç Universitetit të Tetovës, ishin të rinj dhe studentë nga Kosova, Moldavia, Rumania dhe Austria.