Miratohen zyrtarisht rregullat e reja për hyrje në BE, do të vlejnë edhe për ne

Bruksel, 20 maj – Këshilli i Bashkimit Europian dhe Parlamenti Europian miratuan dje marrëveshjen e përkohshme mbi futjen graduale të Sistemit të Hyrjes/Daljes (EES), një sistem i ri dixhital i menaxhimit të kufijve.

Falë kësaj marrëveshjeje, shtetet anëtare do të jenë në gjendje të zbatojnë sistemin e ri të menaxhimit të kufijve për regjistrimin e hyrjes dhe daljes në zonën Shengen të qytetarëve nga vendet jo-anëtare të BE-së. “Ky është një lajm i mirë dhe do të mbështesë përpjekjet tona për kufij të sigurt”, tha Ministri i Brendshëm polak Tomasz Siemoniak, sipas një deklarate të publikuar në faqen e internetit të Këshillit të BE-së, transmeton Zhurnal.mk

Marrëveshja e arritur sot është e përkohshme dhe si Këshilli i BE-së ashtu edhe Parlamenti Evropian duhet ta konfirmojnë atë përpara se ta miratojnë zyrtarisht.

EES është një sistem IT që do të digjitalizojë të dhënat e hyrjeve dhe daljeve, të dhënat e pasaportave, gjurmët e gishtërinjve dhe fotografitë e njerëzve nga vendet jo-anëtare të BE-së që udhëtojnë për një qëndrim të shkurtër në cilindo nga 29 vendet europiane.

Ky sistem, i cili do të zëvendësojë sistemin aktual të printimit manual të pasaportave, do të zbatohet edhe për qytetarët e Maqedonisë kur kalojnë kufijtë e BE-së.

Siç thuhet në faqen e internetit të Këshillit të BE-së, brenda kuadrit të zbatimit me faza, shtetet anëtare do ta zbatojnë gradualisht sistemin EES dhe do të duhet të regjistrojnë të paktën 10% të kalimeve kufitare pas muajit të parë të zbatimit, transmeton Zhurnal.mk

Për 60 ditët e para, Shtetet Anëtare do të jenë në gjendje ta përdorin EES pa funksionalitete biometrike, dhe pas tre muajsh do të duhet ta përdorin atë me funksione biometrike në të paktën gjysmën e pikave të tyre të kalimit kufitar.

Deri në fund të kësaj periudhe tranzicioni, shtetet anëtare do të vazhdojnë të shtypin manualisht dokumentet e udhëtimit. Rregullorja që prezanton sistemin EES nuk përcakton një datë specifike për fillimin e zbatimit, pasi kjo kërkon një vendim të veçantë nga Komisioni Europian, transmeton Zhurnal.mk

Ligjvënësit ranë dakord që gjatë lançimit gradual të sistemit EES, shtetet anëtare mund ta pezullojnë plotësisht ose pjesërisht funksionimin e sistemit në pika të caktuara të kalimit kufitar në rrethana të jashtëzakonshme – për shembull, për shkak të trafikut të rënduar që mund të çojë në radhë të gjata.

Në mars, ministrat e brendshëm të BE-së miratuan gjithashtu planin e rishikuar për futjen e të ashtuquajturës arkitekturë të ndërveprimit – një sistem i ndërlidhur i IT-së për menaxhimin e kufijve dhe zbatimin e ligjit, transmeton Zhurnal.mk

Sipas planit të miratuar nga bordi drejtues i agjencisë eu-LISA, përgjegjëse për ndërtimin e infrastrukturës së IT-së, vendosja graduale e EES do të fillojë në tetor 2025, ndërsa Sistemi Europian i Informacionit dhe Autorizimit të Udhëtimit (ETIAS) do të bëhet funksional në tremujorin e fundit të vitit 2026.