“Sulmet e ardhshme do të jenë edhe më brutale”, Trump paralajmëron Iranin: Bëni marrëveshjen, ata që ishin kundër vdiqën tani

Presidenti amerikan Donald Trump i ka bërë thirrje Iranit që të arrijë një marrëveshje për programin e tij bërthamor, duke thënë në një postim në platformën e tij “Truth Social” se ende ka kohë për të shmangur një përshkallëzim të mëtejshëm të konfliktit me Izraelin.

“I dhashë Iranit mundësi pas mundësie për të arritur një marrëveshje. U thashë, me fjalët më të forta, ‘thjesht bëjeni’, por sado që u përpoqën, sado afër që ishin, thjesht nuk arritën ta realizojnë.
U thashë se ajo që do të vinte do të ishte shumë më keq se gjithçka që ata e njohin, e presin apo që u është thënë, se Shtetet e Bashkuara prodhojnë pajisjet më të mira dhe më vdekjeprurëse ushtarake në botë, PA KONKURENCË, dhe se Izraeli ka shumë prej tyre, dhe më shumë po vijnë – dhe ata dinë t’i përdorin.

Disa zyrtarë të vijës së ashpër në Iran folën me guxim, por nuk e dinin çfarë po vinte. Tani janë të gjithë TË VDEKUR, dhe do të bëhet vetëm më keq!

Tashmë ka pasur shumë vdekje dhe shkatërrim, por ende ka kohë për ta ndalur këtë masakër, sepse sulmet e ardhshme që janë planifikuar do të jenë edhe më brutale.

Irani duhet të bëjë një marrëveshje, përpara se të mos mbetet më asgjë dhe të shpëtojë atë që dikur njihej si Perandoria Iraniane. Mjaft më me vdekje, mjaft më me shkatërrim, “THJESHT BËJE, PËRPARA SE TË JETË VONË.” Zoti ju bekoftë të gjithëve!”