Po sikur presioni i poshtëm i gjakut të jetë mbi 100? Prisni pesë minuta, pastaj veproni menjëherë

Nëse presioni i ulët i gjakut (diastolik) është mbi 100 mmHg, ekziston rreziku i këputjes së aortës dhe goditjes në tru

Kur vlera e presionit diastolik kalon kufirin e sipërm prej 80 mmHg, konsiderohet si hipertension diastolik. Në mënyrë normale, ai varion nga 60 deri në 80 mmHg. Kur tejkalon vlerën 100 mmHg, veçanërisht nëse kalon edhe 120 mmHg, bëhet fjalë për një gjendje serioze që kërkon kujdes të menjëhershëm mjekësor.

Presioni diastolik (i njohur si “presioni i poshtëm”) përfaqëson forcën me të cilën gjaku ushtron presion në muret e arterieve ndërkohë që zemra pushon mes dy rrahjeve. Kur kjo vlerë është e lartë, rritet ndjeshëm rreziku për dëmtim të arterieve, veçanërisht të aortës – arteria më e madhe në trup.

Personat me presion të ngritur diastolik janë më të rrezikuar nga aneurizma e aortës abdominale – një zgjerim i rrezikshëm i saj që mund të çojë në këputje (rupturë), e cila shpesh është fatale, transmeton Telegrafi.

Gjithashtu, vlera të larta të presionit të ulët, veçanërisht mbi 100 mmHg, shoqërohen me rritje të rrezikut për goditje në tru. Kjo gjendje është më e zakonshme te personat me mbipeshë, nivele të larta të sheqerit në gjak dhe triglicerideve, si dhe te ata me histori familjare të hipertensionit apo probleme të mëparshme kardiovaskulare. Meshkujt janë pak më të rrezikuar se femrat.

Nëse gjatë matjes së tensionit pajisja tregon se presioni i poshtëm është mbi 100 mmHg, këshillohet të prisni pesë minuta në qetësi dhe ta matni sërish. Nëse vlera mbetet e njëjtë, kontaktoni menjëherë mjekun për të përcaktuar shkakun dhe për të marrë trajtimin e përshtatshëm.

Përveç terapisë, është thelbësore të ndryshohen zakonet e jetesës: ndalimi i duhanit, kufizimi i konsumit të alkoolit dhe adoptimi i një diete të shëndetshme dhe të balancuar janë hapa vendimtarë drejt përmirësimit të shëndetit kardiovaskular.