BDI reagon ashpër ndaj projektligjit të ri për përfaqësim të drejtë

Bashkimi Demokratik për Integrim reagon ashpër ndaj projektligjit të ri për përfaqësim të drejtë, i cili u shfaq në disa media si një “balon prove”, me qëllim testimin e reagimeve të opinionit publik.

Në vend që të paraqesë një hap përpara drejt fuqizimit të parimit të përfaqësimit të drejtë – që do të përfshinte edhe përfaqësimin cilësor të komuniteteve në pozita të larta në administratë – ky projektligj i ri redukton edhe mekanizmat ekzistues që deri tani siguronin përfaqësim sasior të komuniteteve jo-shumicë.

Ky propozim nuk e mbron, por përkundrazi e minon parimin kushtetues të përfaqësimit të drejtë, duke hyrë në konflikt të drejtpërdrejtë me Marrëveshjen Kornizë të Ohrit dhe me ndryshimet kushtetuese që burojnë prej saj.

Ajo që e bën edhe më shqetësues këtë propozim është se ai përputhet me premtimin parazgjedhor të VMR0-së dhe të koalicionit ZNAM, për të shfuqizuar mekanizmat ligjorë që kishin karakter detyrues dhe garantonin përfaqësimin e drejtë gjatë punësimeve në sektorin publik.

Nuk na habit ky qëndrim, sepse menjëherë pas shfuqizimit të Balancuesit, ishim dëshmitarë të një numri të madh shpalljesh dhe punësimesh, ku ose punësoheshin vetëm maqedonas, ose përfaqësimi i komuniteteve tjera ishte minimal dhe simbolik.

Ajo që na habit dhe na indinjon është lehtësia me të cilën mbetjet e VLEN-it brenda qeverisë po lejojnë një përulje të tillë të pozitës së shqiptarëve në shtet – dhe bashkë me ta, edhe të komuniteteve të tjera jo-shumicë.

Si parti politike, do t’i përdorim të gjitha mjetet dhe mekanizmat që na ofron ligji dhe demokracia dhe nuk do të lejojmë ligjërimin e dominimit monoetnik dhe të një mazhorizimi të ligjëruar përmes institucioneve.

I bëjmë thirrje të gjithë deputetëve nga radhët e komuniteteve që të na bashkohen në hapat e mëtejshëm – në debatin publik, në ndërhyrjet përmes amendamenteve, dhe në sigurimin e shumicës së Badenterit – me qëllim të ndalimit të një ligji të rrezikshëm që, në mënyrë të fshehtë, tenton të minojë një nga shtyllat themelore të rendit kushtetues multietnik të këtij shteti.