Mësohet gjendja e Mbappes, ‘parashikohet’ rikthimi i tij

Xabi Alonso do të marrë një vendim të vonshëm për Kylian Mbappé përpara përballjes së Real Madrid me Juventusin më 1 korrik në kuadër të Kupës së Botës për Klube.

Një fitore 3-0 ndaj RB Salzburg e siguroi vendin e parë në Grupin H për Realin dhe tani Alonso shpreson të rikthejë sulmuesin e tij kryesor.
Mbappé ka munguar në të treja ndeshjet e fazës së grupeve në SHBA për shkak të sëmundjes, por tashmë është rikthyer në stërvitje të plotë me ekipin.

Alonso vendosi të mos rrezikojë me të ndaj Salzburgut, duke theksuar se donte t’i jepte pak më shumë kohë për rikuperim. Ai përsëriti qëndrimin e tij mbi durimin në rikthimin e Mbappé-së:

“Nuk dua të jem shumë optimist dhe të nxitohem, por kemi nevojë për të, sepse është një lojtar i jashtëzakonshëm, një nga më të mirët në botë. Shpresojmë të rikthehet së shpejti.”

Nëse nuk ka ndonjë pengesë tjetër, Mbappé pritet të debutojë në SHBA pikërisht ndaj Juventusit, dhe në atë rast Gonzalo Garcia pritet të ulet në stol.

Nga ana tjetër, Aurelien Tchouaméni ka zhvilluar 90 minuta në të gjitha ndeshjet e deritanishme dhe Alonso e ka lavdëruar për adaptimin e tij në prapavijë, duke ndihmuar Dean Huijsen dhe Raul Asencio në mbrojtje.

Tchouaméni, i sigurt në formacionin titullar ndaj Juventusit, tha:

“Jemi shumë të entuziazmuar për rikthimin e Kylian në skuadër. Ai është një lojtar i jashtëzakonshëm për ne. Gonzalo po luan shumë mirë, por do ta shohim Kylianin në fushë shumë shpejt.”