Ekskluzive: Qytetarit nga Skenderaj i zbrazet llogaria bankare në BPB – Mbi 14 mijë euro tërhiqen përmes mashtrimeve online nga adresa të huaja në Evropë

Një rast shqetësues dhe alarmues i mashtrimit financiar është regjistruar në Skenderaj, ku një qytetar ka përjetuar një humbje të rëndë financiare pas tërheqjes misterioze të mbi 14 mijë eurove nga llogaria e tij bankare në Bankën për Biznes – BPB.

Bëhet fjalë për një skemë të dyshuar mashtruese e cila, siç dyshohet, është orkestruar përmes transaksioneve të sofistikuara online nga persona të panjohur me lokacione në shtete të ndryshme të Evropës.

Burimet ekskluzive të Sinjalit brenda organeve të sigurisë bëjnë të ditur se viktima, A.R., rreth 38-vjeçar, nga Skenderaj, ka paraqitur një ankesë në polici më 10 korrik 2025, duke raportuar për zhdukjen e fondeve nga llogaria e tij bankare. Sipas deklaratës së tij, që nga 19 marsi i këtij viti e deri më datën e raportimit, janë realizuar dhjetëra pagesa online pa dijeninë, autorizimin apo ndërhyrjen e tij, të cilat kanë arritur shumën totale 14,578 euro.

Qytetari ka deklaruar qartë se nuk ka bërë asnjëherë pagesa përmes internetit dhe nuk ka ndarë të dhënat bankare me askënd, duke ngritur dyshime serioze për një sulm të qëllimshëm në sistemin e tij bankar ose për rrjedhje të mundshme të të dhënave sensitive në mënyrë të organizuar.

Rasti ka alarmuar jo vetëm familjen e viktimës, por edhe zyrtarët e bankës. Me të pranuar denoncimin, Prokuroria e Shtetit është vënë në dijeni dhe ka udhëzuar hapjen e hetimeve për veprën penale “Lëshimi i çeqeve pa mbulesë ose të rreme dhe keqpërdorimi i kartelave të bankës apo të kreditit,” sipas dispozitave të Kodit Penal të Republikës së Kosovës.

Aktualisht, njësitet hetimore pritet të analizojnë të gjitha gjurmët digjitale të transaksioneve, adresat IP nga të cilat janë kryer pagesat dhe do punojnë në bashkëpunim me institucionet financiare për të ndjekur rrjedhën e parave, si dhe për të zbuluar identitetin e personave të përfshirë në këtë skemë kriminale.

Ky rast alarmant rikthen në vëmendje rrezikun real dhe të pranishëm të mashtrimeve kibernetike që po prekin gjithnjë e më shumë qytetarë në Kosovë, duke ngritur shqetësime për sigurinë e të dhënave bankare dhe mbikëqyrjen e sistemit të pagesave online. Hetimet janë në fazë të hershme, por mund të përballen edhe me vështirësi deri në zbardhje të plotë të rastit dhe vënien e përgjegjësve para drejtësisë.

Gazeta Sinjali do të ndjekë zhvillimet për këtë rast me përparësi të lartë.