Zënkë mes bashkëshortëve, gruaja godet burrin me mjet të mprehtë

Një konflikt familjar ka përfunduar me plagosjen e një burri 71-vjeçar, i cili është goditur me mjet të mprehtë nga bashkëshortja e tij 65-vjeçare.

Ngjarja ndodhi në Shtip, në banesën e tyre familjare pas një zënke mes çiftit, njoftojnë nga Sektori për Punë të Brendshme në Shtip.

Sipas informacioneve zyrtare, ngjarja u raportua rreth orës 23:40 të mbrëmjes së kaluar. E dyshuara B.J., 65 vjeçe, dyshohet se e ka goditur burrin e saj pasi ai e kishte kapur për fyti. Si pasojë e incidentit, 71-vjeçari është dërguar në Spitalin Klinik të Shtipit, ndërsa për momentin nuk ka informacione të detajuara për gjendjen e tij shëndetësore.

Gruaja është arrestuar nga policia dhe ndaj saj pritet të ndërmerren veprime të mëtejshme ligjore.