Hamas-i pranon propozimin e ri për armëpushim në Gaza

Një burim i Hamasit ka konfirmuar për Al Jazeera-n se lëvizja ka pranuar propozimin e ri për një armëpushim në Rripin e Gazës, të paraqitur nga ndërmjetësit ndërkombëtarë. “Ne i kemi informuar ndërmjetësit për marrëveshjen tonë mbi propozimin e paraqitur dje”, tha burimi i lëvizjes palestineze.

Sipas detajeve, marrëveshja e re parashikon:

Lirimin e 10 pengjeve izraelitë të gjallë dhe 18 trupave të pajetë,
Lejimin e ndihmave humanitare në Gaza përmes organizatave ndërkombëtare, përfshirë Kryqin e Kuq, Gjysmëhënën e Kuqe dhe Kombet e Bashkuara,
Si dhe një armëpushim 60-ditor mes palëve.
Ky zhvillim vjen pas muajsh të tërë lufte shkatërrimtare që ka shkaktuar mijëra viktima dhe një krizë të thellë humanitare në Gaza. Përpjekjet e mëparshme për të arritur një marrëveshje kanë dështuar për shkak të mosmarrëveshjeve mbi lirimin e pengjeve dhe garantimin e korridoreve të sigurta për furnizimet humanitare.

Pranimi i propozimit nga Hamasi shihet si një hap i rëndësishëm për të ulur tensionet dhe për t’u dhënë hapësirë negociatave të mëtejshme. Megjithatë, mbetet për t’u parë nëse Izraeli do të pranojë termat e rinj, pasi qeveria e Benjamin Netanyahut ka theksuar disa herë se nuk do të bëjë lëshime që, sipas saj, mund të forcojnë Hamasin ushtarakisht.