VMRO-DPMNE sulmon Filipçen: “Je simbol i luksit, jo i ekonomisë”

Partia në pushtet, VMRO-DPMNE, ka reaguar ashpër ndaj deklaratave të liderit të LSDM-së, Venko Filipçe, i cili foli për situatën ekonomike dhe për investimet në vend. Në një kumtesë me tone të ashpra, VMRO e cilësoi Filipçen si “personi i fundit që ka të drejtë të flasë për ekonomi”, duke e akuzuar për luks dhe hedonizëm, në një kohë kur qytetarët përballeshin me varfëri, përcjell PressOnline.al.

“Investimi më i madh i LSDM-së i përket jahteve dhe kullave në Dubai, plantacioneve në Afrikë dhe bizneseve milionëshe private të individëve – produkt të krimit dhe korrupsionit,” thuhet në reagimin e VMRO-DPMNE.

Sipas kësaj partie, gjatë qeverisjes së LSDM-së, investitorët nuk vinin në vendin tonë, por iknin prej tij, pasi Maqedonia ishte “e kapur nga korrupsioni dhe zhvatja”. Ata e përshkruajnë atë periudhë si kohë të një “boomi të tenderëve” dhe të rritjes së pasurisë personale të një kaste të privilegjuar.

Për të kundërshtuar kritikat e Filipçes, VMRO-DPMNE sjell dy fakte kryesore:
1. Sipas raportit të Greenfield FDI Performance Index 2025, Maqedonia renditet në vendin e gjashtë në botë për investime të huaja direkte, në raport me PBB-në.
2. Në vitin 2024, vendi ka shënuar një rekord historik prej mbi 1.25 miliardë euro në investime të huaja direkte.

“Filipçe dhe LSDM nuk sollën fabrika, por borxhe të reja, biznese të mbyllura dhe varfëri. Dhe sot, ndërsa vendi po rimëkëmb besimin, ai flet nga shezlloni me grafikë në dorë. Më pak grafikë, më shumë turp,” thuhet më tej në reagim.

VMRO-DPMNE akuzon LSDM-në se po vazhdon me të njëjtin stil arrogant dhe të shkëputur nga realiteti si në kohën kur “premtonte jetë, por solli mjerim dhe vjedhje”. Ata thonë se qytetarët nuk kanë harruar se kush e rrënoi ekonominë dhe kush sot po e ngre atë nga hiri.