Nikolloski: Qeveria është seriozisht e përkushtuar ndaj sportit, pothuajse nuk ka vend ku nuk investojmë

Zëvendëskryeministri dhe ministër i Transportit dhe Lidhjeve, Aleksandar Nikolloski, në fjalimin e sotëm në “Samitin Rajonal të Sportit Shkupi 2025” paralajmëroi investime edhe më të mëdha në infrastrukturën sportive në të gjithë vendin tonë dhe ndryshime ligjore për lehtësim financiar gjatë investimeve në sport.

“Si qeveri, ne jemi seriozisht të përkushtuar ndaj sportit. Ajo që mund të bëjmë është të ndihmojmë në zhvillimin e infrastrukturës dhe t’u japim një shans të gjithë atyre që duan të luajnë sport. Ne kemi prezantuar një program ambicioz për të mbështetur vetëqeverisjen lokale në të cilin ndahen mjete serioze për sportin. Përmes Ministrisë së Sportit, ne investojmë dhe pothuajse nuk ka vend ku nuk ofrojmë infrastrukturë sportive dhe kështu u mundësojmë të rinjve të praktikojnë sportin. Nga ana tjetër, janë në proces disa ndryshime legjislative që do të mundësojnë lehtësim financiar dhe mundësinë e investimeve serioze në sport. Besoj se kjo sinergji midis investimeve në infrastrukturë dhe mundësisë së investimit në sport do të japë rezultate. Ne si Qeveri jemi këtu sa herë që mund të ndihmojmë dhe të ofrojmë mbështetje dhe puna jonë ndalet këtu, sepse duam ta mbajmë politikën larg sportit”, tha ministri Nikolloski në fjalimin e tij.

Shkupi sot është nikoqir i Samitit të parë Rajonal të Sportit nën moton “Sporti si identitet kombëtar dhe vizion për të ardhmen”.

Në samit marrin pjesë, ndër të tjerë edhe ministrat e Sportit të Republikës së Serbisë, Zoran Gajiq, i Malit të Zi, Dragoslav Shçekiq, si dhe nikoqiri, ministri i Sportit i Maqedonisë, Borko Ristovski.