Marrëdhëniet ekonomike dhe tregtare ,një komponent kyç i lidhjeve dypalëshe Kinë -SHBA

Kryeministri kinez Li Qiang tha të enjten se, duke parë drejt së ardhmes, Kina dhe Shtetet e Bashkuara duhet të gjejnë mënyrën e duhur për të bashkëjetuar. Ai bëri thirrje për shtimin e përpjekjeve për të forcuar lidhjet Kinë-SHBA dhe për të zgjeruar bashkëpunimin dypalësh.

Li i bëri komentet gjatë takimit me përfaqësuesit e organizatave miqësore në Shtetet e Bashkuara, si Këshilli i Biznesit SHBA-Kinë, Komiteti Kombëtar për Marrëdhëniet SHBA-Kinë, Dhoma e Tregtisë e SHBA-së dhe Këshilli për Marrëdhëniet me Jashtë, si dhe studiues dhe udhëheqës biznesi, në kuadër të debatit të përgjithshëm të sesionit të 80-të të Asamblesë së Përgjithshme të Kombeve të Bashkuara.

Marrëdhëniet ekonomike dhe tregtare janë një komponent kyç i lidhjeve dypalëshe, shtoi kreu i qeverisë kineze. Ai tha se Kina ka besimin dhe aftësinë për të ruajtur një zhvillim ekonomik të qëndrueshëm dhe të shëndetshëm, duke krijuar më shumë mundësi për ndërmarrjet nga e gjithë bota, përfshirë kompanitë amerikane.

Pjesëmarrësit amerikanë shprehën vlerësim për arritjet e Kinës në fushën ekonomike, risitë teknologjiko-shkencore dhe zhvillimin shoqëror. Sipas tyre, marrëdhëniet amerikano-kineze kanë të bëjnë me dy vendet dhe botën.

Ata shprehën shpresën se SHBA-ja dhe Kina do të ruajnë shkëmbime të nivelit të lartë, do të zgjerojnë dialogun në fusha të ndryshme, do të forcojnë bashkëpunimin me përfitime të ndërsjella dhe do të rrisin shkëmbimet njerëzore, duke zhvilluar kështu një marrëdhënie afatgjatë dhe të qëndrueshme dhe duke shtuar më shumë faktorë sigurie për komunitetin ndërkombëtar.