Rritje masive e prodhimit të raketave, CNN: Kina nis ‘garën’ e re bërthamore

Që nga viti 2020, Kina ka ndërmarrë një zgjerim të madh të fabrikave dhe qendrave të prodhimit të raketave, duke forcuar kapacitetet e saj ushtarake dhe duke treguar ambiciet për t’u pozicionuar si një superfuqi globale.

Analiza e CNN mbi imazhet satelitore, hartat dhe njoftimet qeveritare zbulon se mbi 60% e 136 objekteve të lidhura me forcën raketore kineze, që menaxhon arsenalin bërthamor të vendit, kanë shfaqur shenja të zgjerimit.

Këto objekte përfshijnë fabrika, qendra kërkimore dhe teste, të cilat kanë shtuar mbi 2 milionë metra katrorë hapësirë ndërtimi në pesë vitet e fundit. Në disa raste, në imazhe satelitore duken edhe pjesë të raketave.

Ekspertët e sigurisë paralajmërojnë se ky zgjerim është pjesë e një strategjie më të gjerë të Kinës për të zhvilluar raketa më të avancuara dhe për të rritur aftësinë e saj për të penguar ndërhyrjen ushtarake të SHBA-së në rajon. Raketat e prodhuara do të jenë një komponent kyç i strategjisë për të mbajtur Tajvanin nën presion dhe për të krijuar një zonjë pranë bregut kinez, e cila mund të pengojë ndihmën amerikane në rast të një konflikti.

Që nga ardhja e Xi Jinping në pushtet në 2012, Kina ka investuar miliarda dollarë në blerjen dhe modernizimin e pajisjeve ushtarake. Ai ka ndërtuar gjithashtu Forcën Raketore të PLA-së (PLARF), një degë elitare që menaxhon arsenalin bërthamor dhe raketat balistike të vendit, duke e përshkruar atë si “koren e mbrojtjes strategjike” dhe bazën për sigurinë kombëtare të Kinës.

Sipas të dhënave të SIPRI, Kina po rrit arsenalin e saj bërthamor me rreth 100 kokëbërthama të reja në vit që nga 2023, duke u bërë një nga vendet me rritjen më të shpejtë në këtë fushë, edhe pse totalisht mbetet pas SHBA-së dhe Rusisë që kontrollojnë 90% të arsenaleve globale. Zgjerimi i prodhimit ka përshpejtuar gjithashtu pas pushtimit të Ukrainës nga Rusia në 2022, duke u parë si një mundësi për të marrë mësime nga përdorimi i teknologjive moderne në luftë dhe për të përmirësuar aftësitë raketore të vendit.

CNN identifikoi 99 objekte të lidhura me prodhimin e raketave dhe konstatoi se 65 prej tyre janë zgjeruar ndjeshëm gjatë pesë viteve të fundit. Analiza tregon se Kina po ndërton kulla, bunkerë dhe struktura të tjera që lidhen me zhvillimin e armëve, duke transformuar ndonjëherë fshatra dhe toka bujqësore në qendra moderne prodhimi.

Ndërkohë, SHBA po përballet me sfida të furnizimit të sistemeve të mbrojtjes, si THAAD, të cilat janë të shtrenjta dhe kërkojnë kohë për t’u prodhuar. Ekspertët paralajmërojnë se ky kombinim, kapacitetet në rritje të Kinës dhe vështirësitë e furnizimit të SHBA-së, mund të krijojë tensione të reja në Azi-Paqësor dhe në skenën globale.

Rritja e kapaciteteve raketore kineze ka alarmuar ekspertët e kontrollit të armëve, të cilët paralajmërojnë se kjo mund të rrisë rrezikun e një konflikti të mundshëm dhe të transformojë garën globale të armatimeve në një “luftë të nxehtë” në të ardhmen.