Sulmet ukrainase paralizojnë rafinerinë që furnizon me karburant Moskën

Rafineria e naftës në Ryazan, në pronësi të gjigantit energjetik rus Rosneft, e cila furnizon me karburant rajonin e Moskës, ka ndërprerë sërish përpunimin e naftës së papërpunuar pas një sulmi me dron ukrainas më 15 nëntor.

Pritet që rafineria më e madhe e Rosneft-it, e cila vitin e kaluar përpunoi 13,1 milionë tonë naftë të papërpunuar (5 për qind e kapacitetit të përgjithshëm të rafinimit në Rusi), të mbetet jofunksionale të paktën deri në fund të muajit, raporton Moscow Times.

Sulmi me dron i 15 nëntorit shkaktoi zjarr në uzinë dhe dëmtoi njësinë e saj kryesore të përpunimit të naftës së papërpunuar, e cila përbën 48 për qind të kapacitetit të saj, rreth 8 milionë tonë në vit.

Më 23 tetor 2025, rafineria në Ryazan ndaloi pjesërisht punën pas një sulmi tjetër me dron: njësia e distilimit primar AVT-4 dhe disa njësi përreth u dëmtuan, duke i shkaktuar impiantit humbjen e rreth një të katërtës së kapacitetit të tij.

Tani ajo është plotësisht e paralizuar dhe të gjitha njësitë janë mbyllur.

Sulmet me dron gjithashtu e detyruan rafinerinë në Ryazan të ndërpriste një pjesë të operacioneve edhe në gusht dhe shtator. Vitin e kaluar, uzina prodhoi 2,3 milionë tonë benzinë, 3,4 milionë tonë naftë dhe 4,2 milionë tonë vaj djegës.