VLEN: AKI po shpërbëhet në sy të opinionit! Një opozitë që bëhet copa-copa e dëmton sistemin politik

Nga koalicioni VLEN përmes një kumtese mëngjesin e sotëm kanë komentuar largimet e fundit nga Aleanca Kombëtare për Integrim. Nga VLEN thonë se kjo vërteton se AKI-ja ka qenë koalicion interesash ndërsa shtojnë se si koalicion, kanë nevojë për opozitë të fortë.

“Opozita shqiptare sot ngjan si një çadër e vjetër që çahet sapo fryn era. Ajo që VLEN e ka paralajmëruar prej kohësh, sot është bërë realitet koalicioni me shirit ngjitës i quajtur AKI ka qenë mashtrimi më i madh politik i viteve të fundit. Largimet e njëpasnjëshme dhe kaosi i brendshëm tregojnë qartë se ky projekt nuk u ndërtua për shqiptarët, por për ambicie personale të paketuar me PR-trukun e “referendumit” për t’u hedhur hi syve të shqiptarëve. AKI nuk funksionoi asnjë ditë si opozitë serioze. Sot po shpërbëhet në sy të opinionit, gur më gur, figurë pas figure. Ikja e Menduh Thaçit, largimi i Arjanit Hoxhës, Krenar Llogës dhe braktisja e Ziadin Selës janë vetëm simptoma të një strukture të ndërtuar mbi interesat e individëve, jo mbi interesin e qytetarëve. VLEN nuk gëzohet kur të tjerët shkatërrohen, por është e qartë se një opozitë që bëhet copa-copa e dëmton sistemin politik dhe e lë qytetarin pa alternativë. Shqiptarët meritojnë seriozitet, jo eksperimente të dështuara me shirit ngjitës”, thonë nga VLEN.