Dimitrieska-Koçoska: Buxheti i vitit 2026 është zhvillimor, çdo zë është projektuar me kujdes

21 nëntor 2025, Shkup – Buxheti i vitit 2026 është real, zhvillimor dhe çdo zë është projektuar me shumë kujdes. Rritja parashikohet në 3.8%, ndërsa deficiti buxhetor në 3.5% të PBB-së, që është në përputhje me angazhimin për konsolidim fiskal. Këtë e theksoi Ministrja e Financave Gordana Dimitrieska-Koçoska në ditarin e RTM-së.

“Fakti është se Buxheti i vitit 2026 është zhvillimor. Me kolegët në Ministrinë e Financave arritëm maksimumin në aspektin e projektimit të buxhetit individual për secilin institucion, duke marrë parasysh se duhet të kemi buxhet zhvillimor, duhet të kemi konsolidim fiskal, por në të njëjtën kohë duhet të shohim edhe detyrimet e secilit prej institucioneve që janë të evidentuara në sistemin e MF-së dhe t’i marrim ato parasysh, si dhe t’i inkorporojmë prioritetet e Qeverisë”, tha ministrja e Financave.

Ajo potencoi se nëpërmjet masave të konsolidimit fiskal dhe kontrollit më të madh në anën e shpenzimeve siç parashikohet në Buxhetin e vitit 2026 dhe vazhdimit të rezultateve pozitive në pjesën e PBB-së, do të kemi edhe ulje të borxhit publik.

Siç shpjegoi ajo, vitin e ardhshëm, mjetet do të sigurohen në tregjet vendase dhe ndërkombëtare për të shlyer detyrimet e krijuara nga Qeveria paraprake, përfshirë edhe pagesën e eurobligacionit të emetuar në vitin 2020 dhe huat e tjera, me ç’rast huamarrja e re do të nevojitet për të financuar deficitin buxhetor. Ministrja pret që borxhi publik të ulet nën 60% të PBB-së më herët se viti 2028, siç parashikohet në Strategjinë e Menaxhimit të Borxhit Publik.

Ajo theksoi se janë siguruar mjet për pagat dhe pensionet në përputhje me dispozitat ligjore dhe se do të ketë rritje të pagës minimale.

Gjatë paraqitjes, njoftoi se Ministria e Financave tashmë po punon për publikimin e emetimi të ri të fletobligacioneve të qytetarëve dhe kjo do të ndodhë shumë shpejt.