VLEN: AKI u shkrinë si plastelina

Koalicioni VLEN ka reaguar ashpër ndaj zhvillimeve të fundit brenda opozitës shqiptare, duke deklaruar se ajo “ngjan si një çadër e vjetër që çahet sapo fryn era”. Sipas VLEN-it, procesi i shpërbërjes së koalicionit AKI ka konfirmuar paralajmërimet e tyre se ky projekt ishte i ndërtuar mbi mashtrim dhe interesa personale.

Në deklaratë thuhet se “koalicioni me shirit ngjitës i quajtur AKI” nuk ka funksionuar asnjë ditë si opozitë serioze dhe se largimet e njëpasnjëshme nga ky subjekt politik tregojnë qartë natyrën e brishtë dhe të pavërtetë të tij.

Sipas VLEN-it, ikja e Menduh Thaçit, largimi i Arjanit Hoxhës, Krenar Llogës dhe braktisja nga Ziadin Sela janë vetëm “simptoma të një strukture të ndërtuar mbi interesat e individëve, jo mbi interesin e qytetarëve”.

Megjithëse thekson se nuk gëzohet nga shpërbërja e subjekteve të tjera politike, VLEN paralajmëron se një opozitë e fragmentuar dëmton sistemin politik dhe i lë qytetarët pa alternativë.
“Shqiptarët meritojnë seriozitet, jo eksperimente të dështuara me shirit ngjitës”, përfundon reagimi.