Bastisje në Shkup, Kumanovë dhe Tetovë – tre zyrtarë nën hetim për zhdukjen e 2 milion kg drithë nga rezervat shtetërore

Më 25.11.2025, OSOSK në koordinim me Prokurorinë Publike të Shkupit ka ndërmarrë veprime zyrtare – kontrolle në shtëpi dhe hapësira tjera në Shkup, Kumanovë dhe Tetovë, për shkak të dyshimeve të forta për kryerjen e veprës penale “Keqpërdorim i pozitës dhe autorizimit zyrtar”, sipas nenit 353 të Kodit Penal.

Sipas informatave fillestare, të cilat i transmeton Tetovasot, personat e përfshirë dyshohet se duke mos e kryer detyrën e tyre zyrtare kanë kontribuar në shuarjen (heqjen nga evidenca) të 1.500.000 kg grurë merkantil dhe 500.000 kg elb nga rezervat shtetërore të mallrave. Si pasojë, buxhetit të shtetit i është shkaktuar dëm prej rreth 780.000 euro.

Hetimet aktualisht përfshijnë tre persona me pozita të larta në administratën shtetërore dhe sektorin e bujqësisë:

1. R.A. – Drejtor në Agjencinë për Rezerva Shtetërore të Mallrave

R.A. dyshohet se në cilësinë e drejtorit të Agjencisë ka kryer keqpërdorim të pozitës zyrtare, duke tejkaluar autorizimet e tij dhe duke kontribuar në dëmtimin e rezervave shtetërore.

2. T.D. – Zëvendës ministër i bujqësisë

T.D. është nën hetim për shkelje të nenit 353 paragrafi 4, pasi dyshohet se ka shfrytëzuar pozitën e tij si zëvendës ministër për bujqësi, pylltari dhe ujitje për përfitime të paligjshme ose vendime në kundërshtim me ligjin.

3. M.P. – Ekspert vlerësues në sektorin e bujqësisë

M.P., në cilësinë e ekspertit vlerësues, dyshohet se ka ndikuar në procedura dhe vlerësime administrative në mënyrë të kundërligjshme, duke keqpërdorur pozitën profesionale.

Hetimet vazhdojnë

Autoritetet kanë kryer bastisje dhe kontrolle në disa lokacione në Shkup, Kumanovë dhe Tetovë. Materialet e sekuestruara janë duke u shqyrtuar nga Prokuroria Publike, e cila ka paralajmëruar se procedurat hetimore do të vazhdojnë deri në zbardhjen e plotë të rastit dhe përcaktimin e përgjegjësisë eventuale penale.

Institucionet theksojnë se ky është një nga rastet më serioze të dyshuara për keqpërdorim të rezervave shtetërore të mallrave vitet e fundit.