Italianët lançojnë kupolën me AI për të mbrojtur Evropën

Kompania italiane e mbrojtjes, “Leonardo” ka shpalosur planet për një mburojë të fuqizuar nga inteligjenca artificiale (AI) për të mbrojtur qytetet dhe infrastrukturën kritike në mes të tensioneve gjeopolitike.

E quajtur “Kupola Michelangelo”, mburoja u zhvillua për të mbrojtur infrastrukturën kritike, zonat urbane të ndjeshme dhe asetet me rëndësi strategjike kombëtare dhe evropiane, tha kompania.

Kompania synon që projekti të jetë plotësisht funksional deri në fund të dekadës, raportoi CNBC.

Kupola “Michelangelo” u zbulua të enjten dhe “Leonardo” thotë se funksionon ndryshe nga kupolat e tjera sepse integron sensorë të gjeneratës së ardhshme në fushat tokësore, detare, ajrore dhe hapësinore, si dhe platforma të mbrojtjes kibernetike, sisteme që kontrollohen me komandë dhe inteligjencë artificiale.

Kompania tha se kjo krijon një ombrellë sigurie që mund të zbulojë, të përcjellë dhe të neutralizojë shumëllojshmëri kërcënimesh, përfshirë raketa hipersonike, dronë, sulme detare dhe nënujore dhe forca armike tokësore – edhe gjatë sulmeve të koordinuara në shkallë të gjerë.

Ajo mund të përdorë gjithashtu sensorë të shumtë dhe algoritma parashikues për të parashikuar aktivitetin armiqësor dhe për të koordinuar automatikisht se cilat kundërmasa do të jenë më efektive, tha kompania.

Evropa ka rritur shpenzimet për mbrojtjen që kur presidenti amerikan Donald Trump tha se mund të zvogëlojë mbështetjen financiare për NATO-n si kundërpërgjigje.

Në tetor 2022, Evropa pati iniciuar Nismën e Mbrojtjes Ajrore (ESSI), që synon forcimin e mbrojtjes së kontinentit nga kërcënimet ajrore pas pushtimit të plotë të Rusisë ndaj Ukrainës në shkurt 2022.

Nuk dihet ende nëse teknologjia e re e “Leonardos” do të integrohet në programin ESSI.