Pse Trump po bën presion mbi Venezuelën, ai sapo na e tha

Donald Trump i ka thënë gjërat e heshtura me zë të lartë. Postimi i tij i së martës në mbrëmje në rrjetet sociale mbi Venezuelën duket si një shpërthim mendimesh, por gjithsesi është shumë zbulues.

“Venezuela është e rrethuar plotësisht nga Armata më e madhe e mbledhur ndonjëherë në historinë e Amerikës së Jugut,” thotë presidenti i SHBA-së. “Do të bëhet vetëm më e madhe, dhe tronditja për ta do të jetë si asgjë që nuk kanë parë kurrë më parë…”

Sipas Sky News kjo është një referencë për praninë masive të Forcave Detare dhe Ajrore Amerikane në Karaibe, pranë Venezuelës. Është me të vërtetë një armatë, dhe ka qenë atje prej muajsh. Në pamje të parë, e gjitha kjo duket pjesë e një misioni antidrogë, për të luftuar tregtinë e drogës nga Venezuela drejt SHBA-së. Të paktën ky është mesazhi publik. Sulmet me raketa dhe dronë ndaj anijeve të dyshuara për drogë në rajon janë pjesë e këtij operacioni.

Por pjesa e dytë e postimit të tij është veçanërisht interesante, sepse tani duket se ai thotë me zë të lartë atë që shumë njerëz kanë dyshuar gjatë gjithë kohës – se në të vërtetë kjo ka të bëjë me ndryshimin e regjimit dhe ka të bëjë më shumë me naftën sesa me drogën.

Ai thotë se ushtria do të mbetet në vend “derisa ata [Venezuela] t’u kthejnë Shteteve të Bashkuara të Amerikës të gjithë naftën, tokën dhe asetet e tjera që na i vodhën më parë.” Ai vazhdon: “Regjimi i paligjshëm i Maduros po përdor naftën nga këto fusha të vjedhura për të financuar veten, terrorizmin e drogës, trafikimin e qenieve njerëzore, vrasjet dhe rrëmbimet.”

Kjo referon faktin se SHBA-të dikur ishin një importuese e madhe e naftës venezueliane. Kompanitë amerikane me seli në vend nxirrnin naftën, dhe rafineritë në bregdetin e Teksasit e përpunonin atë. Rafineritë u përshtatën gjatë dekadave për të rafinuar naftën bruto të trashë dhe të rëndë, tipike për Venezuelën.

Procesi ishte një biznes i madh për firmat amerikane deri kur Venezuela, nën Hugo Chavezin në vitet 2000, shtetëzoi asetet e huaja të naftës. Trump synon që të gjitha këto t’i marrë mbrapsht – naftën, të ardhurat, ndikimin. Pra, duket qartë se e gjithë kjo ka të bëjë me naftën dhe me sferat e ndikimit – hemisferën perëndimore. Trump është i vendosur të vendosë kontrollin amerikan mbi hemisferën perëndimore.

Ambicia përfundimtare duket se është e trefishtë:

• Të rrëzojë regjimin e Maduros dhe të mbështesë një qeveri miqësore;
• Të marrë kontrollin e naftës, përmes partneriteteve tregtare dhe jo forcës;
• Të ndalojë çdo kontrabandë droge dhe njerëzish në SHBA.

Me këtë postim të fundit në rrjetet sociale, Trump i ka thënë të gjitha këto me zë të lartë. Ditë interesante na presin.