‘Konfirmohet’ se Superkupa e Italisë nuk do të luhet në Arabinë Saudite vitin tjetër

Drejtori ekzekutiv i Lega Serie A, Luigi De Siervo, ka konfirmuar se Superkupa e Italisë nuk do të luhet në Arabinë Saudite sezonin e ardhshëm, por duket e pamundur që mini-turneu të rikthehet në tokën italiane në sezonin 2026-27.

Që nga sezoni 2018-19, Superkupa Italiane është zhvilluar në Arabinë Saudite, një herë në Xhedah dhe herët e tjera në Riad.

Përjashtim bëjnë edicionet e viteve 2020 dhe 2021, të cilat u mbajtën në Itali për shkak të pandemisë COVID-19.

Edhe pse marrëveshja fillestare ishte e vlefshme deri në vitin 2029, De Siervo ka lënë të kuptohet se Superkupa mund të zhvendoset në një shtet tjetër pritës në vitin 2026.

“Vitin e ardhshëm nuk do të luajmë në Arabinë Saudite,” i tha De Siervo “SportMediasetit” përpara gjysmëfinales së Superkupës mes Bolognas dhe Interit të premten në mbrëmje.

Kur u pyet nëse Uashingtoni apo Shtetet e Bashkuara mund të jenë një opsion për vitin 2026, De Siervo u përgjigj: “Kemi shumë oferta, sidomos nga Azia dhe Lindja e Mesme”.

De Siervo foli gjithashtu shkurtimisht për ndeshjen Milan–Como në Serie A, e cila pritet të luhet në Perth, Australi.

Ndeshja nuk mund të zhvillohet në “San Siro” për shkak të përplasjes me ceremoninë hapëse të Lojërave Olimpike Dimërore, ndaj palët e përfshira kanë kërkuar që takimi të luhet si një rast i veçantë në Australi.

Ky ka qenë një proces i ndërlikuar burokratik, që ka kërkuar miratim nga organet drejtuese në Itali dhe Australi, si dhe nga UEFA, AFC dhe FIFA.

Javën e kaluar pati sugjerime se ndeshja mund të mos luhej në Australi, por presidenti i Lega Serie A, Ezio Simonelli, konfirmoi të enjten se plani fillestar do të zbatohet.

Ndërkohë, De Siervo shtoi: “Është një sakrificë që ua kërkojmë tifozëve tanë dhe mendoj se ata e kanë kuptuar. Ne kemi nevojë për tregjet ndërkombëtare. Jemi të parët që e bëjmë këtë, por të gjitha ligat e mëdha do të luajnë të paktën një ndeshje jashtë vendit në vitet e ardhshme. Ligat amerikane e bëjnë këtë prej kohësh. Giro d’Italia do të nisë nga Hungaria dhe tre nga 21 etapat do të zhvillohen jashtë Italisë. Po flasim për 0.25%. Është një sakrificë e vogël për të tërhequr spektatorë të rinj dhe për të qëndruar mes katër ligave më të mira në botë”.