Presidenti iranian: Përgjigja e Iranit ndaj çfarëdo agresioni do të jetë e ashpër

Presidenti iranian, Masoud Pezeshkian, ka thënë se përgjigja e shtetit të tij ndaj një sulmi do të ishte e ashpër, deklaratë e cila u duk se ishte përgjigje ndaj paralajmërimit të presidentit amerikan kundër rikthimit të programit bërthamor të Iranit.

“Përgjigja e Republikës Islamike të Iranit ndaj çfarëdo agresioni mizor do të jetë e ashpër dhe dekurajuese”, ka shkruar Pezeshkian në X.

Ai nuk ka shpjeguar më shumë se çfarë donte të thoshte, megjithatë deklarata e tij erdhi një ditë pasi presidenti Donald Trump sugjeroi se SHBA-ja mund të kryejë sulme ushtarake nëse Irani tenton ta rikthejë programin bërthamor, raportoi AP.

“Tani dëgjoj se Irani po përpiqet ta ndërtojë sërish. Dhe nëse po e bëjnë, ne do t’i rrëzojmë. Do t’i shkatërrojmë plotësisht. Por, shpresojmë që kjo të mos ndodhë”, ka thënë Trumpi gjatë takimit me kryeministrin izraelit, Benjamin Netanyahu.

Trumpi shtoi tutje se nëse konfirmohet se Irani po e rikthen programin bërthamor në kapacitete të plotë, SHBA-ja do ta godasë.

“Nëse konfirmohet, ata i dinë pasojat dhe pasojat do të jenë të fuqishme, ndoshta më të fuqishme se herën e kaluar”, ka thënë Trumpi.

Irani ka insistuar se nuk po pasuron uranium më në asnjë vend të vetin.