Groenlanda reagon për qëndrimin e BE-së ndaj tarifave: Jemi në një kohë që duhet guxim i madh

Groenlanda falenderoi kombet evropiane të dielën për vazhdimin e mbështetjes së tyre për ishullin Arktik, pavarësisht se është shënjestruar nga tarifat ndëshkuese nga Presidenti i SHBA-së, Donald Trump, i cili dëshiron të aneksojë territorin e sunduar nga Danimarka.

Franca, Gjermania, Britania dhe vende të tjera evropiane këtë javë dërguan grupe të vogla personeli ushtarak në Groenlandë me kërkesë të Danimarkës, duke bërë që Trump të kërcënojë me tarifa tregtare për tetë aleatë evropianë derisa SHBA-së t’i lejohet të blejë ishullin.

Udhëheqësit evropianë paralajmëruan të shtunën për një “spirale të rrezikshme në rënie” për shkak të kërcënimit të tarifave të Trump, duke u zotuar të mbështesin sovranitetin e Groenlandës dhe Danimarkës. Ambasadorët nga 27 vendet e Bashkimit Evropian do të mblidhen këtë të dielë për të diskutuar përgjigjen e tyre ndaj kërcënimit të tarifave.

“Jetojmë në kohë të jashtëzakonshme që kërkon jo vetëm dinjitet, por edhe guxim të madh”, tha në një deklaratë ministrja e kabinetit të Groenlandës, Naaja Nathanielsen, përgjegjëse për biznesin, energjinë dhe mineralet e ishullit.

Trump thotë se Groenlanda është jetike për sigurinë e SHBA-së për shkak të vendndodhjes së saj strategjike dhe depozitave minerale, dhe nuk e ka përjashtuar përdorimin e forcës për ta marrë atë, duke ngritur alarm në Evropë për perspektivën e një konfrontimi të drejtpërdrejtë midis shteteve të NATO-s.

Kompanitë e Groenlandës nuk kanë gjasa të shohin një ndikim të rëndësishëm nga tarifat e SHBA-së, tha Christian Keldsen, kreu i Shoqatës së Biznesit të Groenlandës.

Sakaq, mijëra protestues në Danimarkë dhe Groenlandë demonstruan të shtunën dhe kërkuan që Trump të largohej nga kërkesa për aneksimin e ishulli Arktik.