“I vlerësoj gjërat tjera më shumë”, Flick flet për performancën e Lamine Yamalit

Trajneri i Barcelonës, Hansi Flick, ka qëndruar pas komenteve të tij se ishte më i impresionuar nga roli i Lamine Yamal në golin e parë kundër Real Oviedos të dielën sesa nga gjuajtja e tij madhështore për golin e tretë.

Lavdërimi i gjermanit ngriti disa vetulla, pasi ai zgjodhi ta largojë fokusin nga supergoli i shënuar nga 18-vjeçari.

Blaugranat kaluan në epërsi kundër Oviedos pas një gabimi në prapavijë, teksa “Los Carbayones” tentuan të dilnin me top nga mbrojtja.

Gabimi u shkaktua pjesërisht nga presioni i lartë i ushtruar nga Lamine Yamal dhe, kur u pyet për goditjen e tij akrobatike me gërshërë, Flick zgjodhi të theksojë kontributin e tij në presingun e lartë.

Duke folur përpara përballjes me Copenhagenin të mërkurën mbrëma në Ligën e Kampionëve, Flick i qëndroi edhe një herë këtyre komenteve.

“Marrëdhënia është e mirë, njësoj si me lojtarët e tjerë. Nëse nuk do ta kishim shënuar golin e parë, ndoshta i treti nuk do të kishte ardhur. Unë e vlerësoj faktin që ai bën presing, që na jep epërsi… Në fund, të gjithë duan të shohin golin, por si trajner unë i vlerësoj më shumë gjërat e tjera, të cilat janë kyçe për të shënuar dhe për të hyrë në një ritëm të mirë loje”, tha ai.

Pas konfirmimit të largimit të Dro Fernandez të hënën, Flick u pyet nëse mendonte se Fermin Lopez, i cili nuk u afirmua në ekipin e parë deri në moshën 20-vjeçare, ishte një shembull për t’u ndjekur nga lojtarët e tjerë të La Masias.

Flick shmangu krijimin e një kontrasti të madh me Dron, pasi Dani Olmo e quajti largimin e tij “për të ardhur keq”, ndërsa raportohet se ky largim e kishte zemëruar trajnerin gjerman. Lopez ka arritur gjithashtu një marrëveshje për një kontratë të re.

“Mendoj se klubi ka bërë një punë të mirë. Ai është një lojtar i shkëlqyer në disa pozicione. Mentaliteti i tij në çdo ndeshje është shumë i mirë. Ai është gjithashtu shumë i mirë me topin dhe jam i lumtur që po qëndron më gjatë. Kur lojtarët vijnë nga La Masia në ekipin e parë, është perfekte. Mendoj se ai e shijon çdo ditë”, shtoi ai.

Alternativa e Flick ndaj Lamine Yamal është ish-lojtari i Copenhagenit, Roony Bardghji.

Sulmuesi suedez u transferua për 2.5 milionë euro gjatë verës dhe ka dy gola e katër asistime në 490 minuta lojë.

Flick u pyet nga mediat daneze për përparimin e tij.

“Ai ka zhvilluar disa ndeshje të mira. Nuk është e lehtë për të, sepse gjithmonë krahasohet me Lamine, por ai është i fokusuar në përmirësimin e përditshëm në stërvitje. Ne morëm vendimin e duhur kur e nënshkruam. Ai luan mirë me të dyja këmbët dhe ka aftësi të mira për finalizim”, përfundoi ai.

Fjalët e Flick nuk duhet të jenë një surprizë e madhe. Trajneri gjerman ka qenë gjithmonë i prirur të theksojë rëndësinë e aspektit mbrojtës për sulmuesit e tij, siç dëshmohet edhe nga vlerësimi i tij i madh për Raphinhan.

Në dhjetor, Flick e lavdëroi posaçërisht presingun e Lamine Yamal në stërvitje dhe talenti adoleshent ka treguar se është më se i aftë teknikisht, por Flick e sheh si një sfidë më të madhe ruajtjen e intensitetit mbrojtës, diçka që ai e shijon më pak.