Armë të gjata, municion, jelek anti-plumb e pajisje ushtarake – Policia e Kosovës gjen sërish armatim në veri

Policia e Kosovës ka sekuestruar të martën armë, municion dhe mjete të tjera ilegale gjatë një kontrolli në një bodrum kolektiv në rrugën “Vasilije Ostroshki” në veri të Mitrovicës.

Operacioni është kryer pas pranimit të një informacioni nga qytetarët, kanë njoftuar autoritetet.

Gjatë kontrollit janë gjetur dhe konfiskuar: tre armë të gjata, një tytë vazhduese, një kondak për armë të gjatë, 764 fishekë të kalibrave të ndryshëm, 14 karikatorë, 10 krehër për fishekë, një granadë dore tymuese, dy antiplumba ushtarakë, dy xhaketa ushtarake, një bluzë dhe një palë pantallona ushtarake, si dhe mbështjellës me material tekstili dhe shirita ngjitës.

“Lidhur me rastin, është njoftuar Prokurori i Shtetit, i cili ka udhëzuar inicimin e rastit për veprën penale ‘Mbajtje në pronësi, kontroll ose posedim të paautorizuar të armëve’”, thuhet në njoftim.

Nuk ka persona të arrestuar, ndërsa rasti mbetet nën hetime.

Njoftimi i plotë i policisë:

Në vazhdën e pranimit të informacioneve nga ana e qytetarëve, sot më datë 03.02.2026, Policia e Kosovës ka pranuar informacion se në një bodrum të një ndërtese në rrugën “Vasilije Ostroshki”, në Mitrovicë Veri, mund të ketë mjete te dyshimta ilegale.

Pas pranimit të informacionit, policia ka ndërmarrë veprime të menjëhershme, ku gjatë kontrollit, përkatësisht në një bodrum kolektiv të ndërtesës, ka gjetur dhe sekuestruar:
• 3 – Armë të gjata
• 1 – tytë vazhduese
• 1 – Kondak për armë të gjatë
• 764 – fishek te kalibrave të ndryshëm
• 14 – karikator
• 10 – krehër për fishek
• 1 – granad dore tymuese
• 2 – antiplumb ushtarak
• 2- jakne ushtarake
• 1 – bluzë e uniformes ushtarake
• 1 – palë pantallona ushtarak
• Mbështjellës me material tekstili
• Shirita ngjitës

Lidhur me rastin është njoftuar Prokurori i Shtetit, i cili ka udhëzuar inicimin e rastit për veprën penale: “Mbajtje në pronësi, kontroll ose posedim të paautorizuar të armëve”.
Në lidhje me këtë rast nuk ka persona të arrestuar, ndërsa rasti mbetet nën hetime.

Policia e Kosovës falënderon qytetarët për bashkëpunimin dhe ndihmën e vazhdueshme, si dhe i inkurajon që çdo rast të dyshimtë apo veprim të kundërligjshëm ta raportojnë në numrin emergjent 192 ose në stacionin më të afërt policor. Vetëm përmes bashkëpunimit të ndërsjellë mund të sigurojmë një ambient më të sigurt për të gjithë qytetarët, pa dallim.