E konfirmon Qeveria: Kurti dhe Abdixhiku takohen në ora 14:00 në Kuvend

Kryeministri i Kosovës, Albin Kurti pritet të zhvillojë një takim me Kryetarin e Lidhjes Demokratike të Kosovës, Lumir Abdixhikun. Ky takim vjen në kuadër të përpjekjeve për të arritur një marrëveshje për zgjedhjen e presidentit të ri dhe për të shmangur zgjedhjee e parakohshme.

Nga Qeveria e Kosovës kanë konfirmuar për Gazetën Online Reporteri.net se takimi mes tyre do të zhvillohet në ora 14:00.

“Kryeministri Kurti takon sot kryetarin e LDK-së, Lumir Abdixhiku në orën 14:00 në hapësirat e Kuvendit”, tha zëdhënësi i qeverisë, Përparim Kryeziu për Gazetën Online Reporteri.net.

Mbrëmjen e së dielës, 22 shkurt, ai zhvilloi një takim me kreun e Partisë Demokratike të Kosovës, Bedri Hamza. Ky i fundit tha se partia që ai drejton nuk ka qenë dhe nuk do të jetë pengesë për proceset shtetërore.

Sipas afateve kushtetuese, Kosova duhet të zgjedhë presidentin e ri deri më 4 mars, pasi mandatit të presidentes aktuale, Vjosa Osmani, i përfundon në fillim të prillit.

Osmani ka shprehur ambicien për një mandat të dytë 5-vjeçar, por deri tani nuk është e qartë nëse i ka votat e nevojshme për rizgjedhje. Ndërkohë, asnjë emër tjetër nuk është zyrtarizuar si kandidat potencial.