Kurti në seancën solemne për Epopenë e UÇK-së: Në Prekaz historia u shkrua me zjarr dhe gjak

Kryeministri i vendit, Albin Kurti, ka folur në seancën solemne që po mbahet në Kuvendin e Kosovës me rastin e 28-vjetorit të Epopesë së UÇK-së, duke kujtuar sakrificën e familjes së Adem Jashari dhe luftën për liri.

Kurti tha se ngjarjet e ndodhura në Prekaz përbëjnë një moment historik për Kosovën dhe simbol të qëndresës përballë shtypjes, raporton Klankosova.tv.

“Në ato ditë të përballjes së vullnetit për liri me aparatin e shtypjes, në Prekaz historia u shkrua me zjarr dhe me gjak, toka u bë altar i lirisë dhe një familje u bë simbol kombëtar. Figura e komandantit legjendar Adem Jashari, e lidhur pazgjidhshmërisht me fatin e familjes dhe bashkëluftëtarëve të tij, u bë personifikim i vendosmërisë për të mos e pranuar nënshtrimin. Kjo sakrificë u përjetua në vetëdijen dhe kujtesën tonë kolektive si mësim i përhershëm se liria paguhet shtrenjtë dhe se ajo është vlerë e panegociueshme dhe e drejtë e patjetërsueshme. Në rrjedhën historike të përpjekjeve të gjata politike e shoqërore për të drejta, barazi dhe dinjitet, kthesa në Prekaz artikuloi qartë aspiratën e popullit të Kosovës për çlirim nga Serbia pushtuese. Epopeja e UÇK-së u bë thirrje për mobilizim, për bashkim dhe artikulim të qartë të synimit tonë për shtetësi dhe mëvetësi”, tha Kurti.