Gjykata shpall të pafajshëm babanë e shoferit që shtypi për vdekje Frosina Kulakovën në Shkup
Gjykata Themelore Penale ka marrë vendim lirues për Zoran Jovanovin, babanë e Vasil Jovanovit, ky i fundit i cili shtypi për vdekje Frosina Kulakovën në bulevardin “Partizanski Odredi” në Shkup.
Aksidenti ndodhi kur Vasil Jovanov, duke drejtuar automjetin në pronësi të babait të tij, goditi Kulakovën derisa ajo po kalonte në vijat e bardha (kalimin e këmbësorëve).
Në arsyetimin e aktgjykimit, Gjykata deklaroi se përgjegjësia penale nuk mund të bazohet vetëm në faktin se i akuzuari ishte pronar i automjetit dhe se djali i tij madhor po e drejtonte atë pa leje drejtimi.
”E drejta penale bazohet në parimin e përgjegjësisë personale dhe individuale, prandaj pasojat e veprimeve të pavarura të një personi madhor nuk mund t’i vishen automatikisht një personi tjetër vetëm për shkak të lidhjes familjare apo pronësisë së automjetit”, deklaron Gjykata.
Sipas vendimit të gjykatës, shkaktari i drejtpërdrejtë i tragjedisë ka qenë shoferi si pjesëmarrës i pavarur në komunikacion, ndërsa përsëritja e sjelljeve kundërvajtëse nuk mund të trajtohet automatikisht si vepër penale nëse nuk plotësohen kushtet ligjore.
Gjatë procedurës, prokurori publik Aleksandar Markovski e rikualifikoi aktakuzën në një vepër penale më të lehtë – rrezikim i sigurisë në komunikacion.
Vendimi u mor nga gjyqtarja Snezhana Markovska, e cila më parë dënoi me burg Vasil Jovanovin për aksidentin rrugor.
Kjo tragjedi pati shkaktuar reagime të ashpra në opinion dhe protesta të shumta, pasi u bë e ditur se Jovanov po drejtonte makinën nën efektin e alkoolit, pa leje drejtimi dhe kishte kaluar me dritë të kuqe përpara se të godiste Frosina Kulakovën.
