SHBA U-20 deklason Maqedoninë U-20 të Aleksandar Tanevskit me rezultat 2:0

Përfaqësuesja U-20 e Maqedonisë është mposhtur me rezultat 2:0 nga SHBA-të në ndeshjen miqësore të zhvilluar në Bullgari, duke lënë sërish hapësirë për pyetje rreth nivelit dhe drejtimit të skuadrës së drejtuar nga trajneri Aleksandar Tanevski.

Edhe pse rezultati u vulos me golat e shënuar në fund të pjesës së parë dhe në minutat shtesë të takimit, loja e Maqedonisë në shumë momente vuajti nga mungesa e ideve në sulm dhe organizimi jo i mjaftueshëm përballë një kundërshtari më cilësor.

Siç mëson Tetovasot, përfaqësuesja maqedonase pati disa raste përmes Dimitar Danevit, Admir Latifit dhe Salim Arifit, por mungoi konkretizimi dhe qartësia në fazën përfundimtare. Pikërisht kjo mbetet një nga problemet kryesore të ekipit të Tanevskit, i cili edhe në ndeshje të tjera ka hasur vështirësi në realizimin e rasteve të krijuara.

Tetovasot vlerëson se humbja ndaj SHBA-ve nuk është vetëm çështje rezultati, por edhe një sinjal se skuadra ka nevojë për më shumë stabilitet dhe identitet në lojë. Pavarësisht se bëhej fjalë për një miqësore, pritej një reagim më i fortë nga ekipi, sidomos në momentet kur ndeshja ishte ende e hapur.

Trajneri Aleksandar Tanevski aktivizoi një numër të madh futbollistësh gjatë takimit, por ndryshimet nuk sollën efektin e dëshiruar. Në fund, amerikanët treguan më shumë qetësi, disiplinë dhe efikasitet, duke marrë një fitore të merituar 2:0.

Për Maqedoninë U-20 mbetet shumë punë për të bërë nëse dëshiron të jetë konkurruese në nivel ndërkombëtar, ndërsa stafi teknik do të duhet të japë përgjigje më bindëse në ndeshjet e ardhshme.TS