Lavrov: Merz në fakt na shpall luftë, kjo është fillimi i një lufte të vërtetë

Ministri rus i Punëve të Jashtme, Sergej Lavrov, akuzoi Gjermaninë se po shkon drejt një “lufte të vërtetë” me Rusinë, pasi Berlini akuzoi Moskën për një sulm hibrid në territorin gjerman.

Qeveria gjermane më 1 shtator, për herë të parë, tregoi drejtpërdrejt Rusinë si përgjegjëse për tentativën e sulmit me dron në aeroportin e Leipzigut, i cili ndodhi në fillim të gushtit. Në aeroport u gjetën dronë me eksploziv dhe njëri prej tyre dëmtoi një avion kargo. Sipas autoriteteve gjermane, shërbimeve të inteligjencës amerikane dhe raporteve mediatike, provat materiale tregojnë për përfshirje ruse, përcjell Pa Censurë.

Lavrov hodhi poshtë akuzat, duke thënë se Gjermania nuk kishte kryer hetim.

“Leipzig, aeroporti… Atje gjetën një lloj droni. Thanë se ishte rus, por askush nuk u mundua të hetonte”, deklaroi Lavrov në një intervistë për gazetarin Pavel Zarubin.

Më pas ai përmendi drejtpërdrejt kancelarin gjerman Friedrich Merz.

“Merz në fakt na shpall luftë. Kjo, në fakt, është fillimi i një lufte të tillë të vërtetë”, tha Lavrov.

Deklaratat e ministrit rus bien ndesh me qëndrimin e qeverisë gjermane. Ministri gjerman i Punëve të Brendshme, Alexander Dobrindt, më 1 shtator deklaroi: “Nuk jemi në luftë, por jemi objektiv i një lufte hibride”.

Lavrov kritikoi gjithashtu masat gjermane kundër Rusisë, duke bërë një krahasim me periudhën para Luftës së Dytë Botërore.

“Më kujtohet se edhe para shpërthimit të Luftës së Dytë Botërore gjermanët mbyllnin përfaqësitë e tyre diplomatike”, tha ai, duke iu referuar mbylljes së objekteve diplomatike ruse në Gjermani.

Në Gjermani, një pjesë e opinionit publik e konsideron përgjigjen e qeverisë shumë të dobët. Në emisionin satirik “Das Heute Show” u tallën reagimi i autoriteteve pas sulmit të pretenduar me dron, si dhe njoftimi për presion shtesë ndaj “flotës në hije” ruse.

Autoritetet gjermane njoftuan sanksione dhe shkëmbim informacionesh inteligjence me Ukrainën, por disa nga masat kërkojnë kohë për të dhënë rezultate. Për sanksionet shtesë të BE-së të propozuara nga ministri gjerman i Punëve të Jashtme, Johann Wadephul, nevojitet një vendim unanim nga vendet anëtare.