E vërteta nuk mund të heshtet: Mbështetje e pakushtëzuar nga CIVIL-i për Qendrën Përkujtimore të Srebrenicës

CIVIL – Qendra për Liri dënon ashpër kërcënimet, presionet dhe frikësimin policor të drejtuar ndaj Qendrës Përkujtimore Srebrenicë – Potoçari dhe drejtorit të saj, Emir Suljagiq. Paralajmërimet për ndërhyrje të mundshme nga forcat speciale të policisë në një institucion që ruan kujtimin e viktimave të gjenocidit nuk janë vetëm absolutisht të papranueshme, por edhe thellësisht shqetësuese për të gjithë rajonin dhe botën demokratike.

Mohimi i gjenocidit në Srebrenicë – në vetvete – është krim. Është një akt dhune të vazhdueshme ndaj viktimave, familjeve të tyre dhe të vërtetës historike që është vërtetuar dhe konfirmuar në mënyrë të qartë nga gjykatat ndërkombëtare. Mohimi është faza e fundit e gjenocidit. Por kur këtij mohimi i shtohet edhe frikësimi, atëherë kalohet në një fazë të rrezikshme të persekutimit aktiv institucional.

Është veçanërisht e tmerrshme, paradoksale dhe tejet hipokrite që këto presione vijnë pikërisht nga një institucion – Ministria e Punëve të Brendshme e Republikës Serbe – obligimi parësor dhe ligjor i të cilit është të kujdeset për sigurinë e të gjithë qytetarëve. Në vend që të jetë garantues i paqes, aparati policor po përdoret dukshëm si instrument për të ngjallur frikë, për presion politik dhe për të tentuar t’u mbyllur gojën atyre që flasin të vërtetën pa lëkundje. Përdorimi i pushtetit institucional për të frikësuar rojet e kujtesës është tipar i politikave jodemokratike dhe revizioniste që nuk kanë vend në Evropën bashkëkohore.

Qendra Përkujtimore në Srebrenicë është një fener global i kujtesës, paralajmërimi më i rëndë për njerëzimin dhe një bastion kundër harresës. Prandaj, çdo sulm ndaj Qendrës ose punonjësve të saj është një sulm i drejtpërdrejtë ndaj vlerave themelore civilizuese dhe të drejtave të njeriut.

Paqja dhe stabiliteti në Ballkan janë të mundshme ekskluzivisht përmes përballjes së sinqertë me të kaluarën dhe marrjes së përgjegjësisë, dhe jo përmes rishikimit dhe fshirjes së saj të dhunshme. Ne bëjmë thirrje për një reagim të fortë, të qartë ndërkombëtar dhe për solidaritet rajonal. Institucionet, mediat dhe shoqëria civile kanë detyrim moral të dalin në mbrojtje të Qendrës Përkujtimore në Srebrenicë.

E vërteta nuk mund të heshtet. Kujtesa nuk mund të fshihet me çizme policore. Mbështetja e CIVIL-it për Qendrën Përkujtimore të Srebrenicës dhe për të gjithë ata që qëndrojnë pa kompromis në mbrojtje të drejtësisë është e plotë dhe e palëkundur.

CIVIL – Qendra për Liri