Vendi praktikisht do të zbrazet – Akademiku Fiti me parashikim alarmant për demografinë e Maqedonisë

Akademiku Taki Fiti paralajmëron se Maqedonia e Veriut mund të bjerë në vetëm rreth 1.2 milionë banorë deri në vitin 2050, për shkak të rënies së lindjeve, plakjes së popullsisë dhe emigrimit.

Në një intervistë për “Triling”, Fiti tha se në fillim të viteve ’90 vendi kishte rreth 2.06 milionë banorë, ndërsa sot rreth 1.8 milionë. Sipas projeksioneve, deri në vitin 2050 numri mund të zbresë në 1.2 milionë.

Një nga shkaqet kryesore është fertiliteti i ulët, i cili është rreth 1.44 fëmijë për grua, shumë më poshtë se niveli prej 2.1 që nevojitet për riprodhimin e popullsisë.

Fiti theksoi gjithashtu se numri i personave mbi 65 vjeç tashmë është më i madh se ai i fëmijëve nën 15 vjeç, duke krijuar presion mbi pensionet, shëndetësinë dhe tregun e punës.

Sipas tij, vendi përballet edhe me mungesë të fuqisë punëtore dhe me mungesë të kuadrove teknike e profesionale, ndërsa në disa fusha shoqërore ka tepricë.

Fiti tha se më shumë se 700 mijë qytetarë jetojnë jashtë vendit, më shumë se një e treta e popullsisë.

Ai vlerësoi se Maqedonia vështirë mund ta kompensojë këtë humbje vetëm përmes importit të fuqisë punëtore, pasi shumë punëtorë të huaj e shohin vendin si pikë tranziti drejt Evropës Perëndimore.

Duke folur për integrimin evropian, Fiti tha se çështja e përfshirjes së bullgarëve në Kushtetutë me gjasë do të mbetet si kusht dhe se, sipas tij, vendi duhet ta përmbushë atë, por kërkoi garanci që çështjet dypalëshe të mos rikthehen në procesin negociues.