Mickoski me lajme të mira për qytetarët: E ndërtojmë Maqedoninë, filloi ndërtimi i autostradës Bukojçan–Kërçovë

I nderuar kryetar i Kuvendit, të nderuar kolegë nga Qeveria, i nderuar ambasador Rokas, i dashur Koce, të nderuar deputetë, kryetarë komunash, përfaqësues të mediave, të dashur mysafirë, të nderuar përfaqësues të kompanisë, apo më mirë të them të konsorciumit që do të realizojë ndërtimin e kësaj pjese të autostradës, ju përshëndes në emrin tim personal dhe në emër të Qeverisë dhe ju falënderoj që sot jeni të pranishëm këtu në këtë ngjarje.
Të gjithë parametrat teknikë që kanë të bëjnë me këtë projekt tashmë u përmendën. Unë nuk do të përsëris se sa mbikalime, tunele dhe objekte të ngjashme ka, pasi përfundimi i këtij segmenti paraqet vërtet një sfidë nga aspekti inxhinierik – tani po flas si inxhinier, jo si kryetar i Qeverisë.
Por, ajo që për mua ka një rëndësi të veçantë është fakti se pa këtë segment, gjithçka tjetër që po bëjmë nuk do të kishte kuptim.
Praktikisht, tani merr kuptim i gjithë projekti që lidh Ohrin me kryeqytetin, me Shkupin, por merr kuptim edhe e gjithë ajo politikë për të cilën foli Aleksandri në fjalimin e tij, përkatësisht politika e kësaj Qeverie, e cila, kur u zgjodh në vitin 2024, vendosi ta shndërrojë vendin në një udhëkryq që do të mbështetet në katër shtylla.

Atëherë filluam me tri shtylla, por disi, me kalimin e kohës, këtë synim dhe këtë sfidë tonën e zgjeruam dhe sot flasim për katër shtylla, përkatësisht: të bëhemi udhëkryq i dy korridoreve panevropiane – Korridorit 8 dhe Korridorit 10, në aspektin e infrastrukturës rrugore, infrastrukturës hekurudhore, infrastrukturës energjetike dhe infrastrukturës së gazit.

Në këtë mënyrë, rëndësia gjeostrategjike e vendit bëhet vërtet diçka që ofron mundësi më të mëdha për të gjithë qytetarët, por njëkohësisht paraqet edhe parakusht për zhvillimin e industrive moderne, ndërsa shteti fiton vërtet një vlerë më të madhe të shtuar, krahasuar me vitet e kaluara.

Unë jam vërtet krenar dhe i lumtur që jam i pranishëm në këto momente të rëndësishme për të ardhmen e vendit dhe për brezat që vijnë, sepse mund të them se të gjitha projektet që janë pjesë e kësaj strategjie të bazuar në katër shtylla kanë filluar, po avancojnë dhe disa prej tyre tashmë janë drejt përfundimit.

Pres që shumë shpejt, duke filluar nga sot, të vihet në qarkullim një segment i autostradës Kërçovë–Ohër, përkatësisht segmenti nga Izvori deri në Vërbjan, ndërsa gjithashtu, siç tha edhe drejtori i Ndërmarrjes Publike për Rrugët Shtetërore, Koce Trajanovski, i gjithë segmenti nga Kërçova deri në Ohër të vihet në qarkullim më së voni në gjysmën e parë të vitit 2027.

Gjithashtu, vitin e ardhshëm pres që të vihet në funksion edhe gazsjellësi që do ta lidhë vendin me fqinjin tonë jugor. Kanë filluar punimet për interkonektorin e gazit me fqinjin tonë verior, po punohet në segmentet e autostradave dhe lidhjet që janë pjesë e Korridorit 8 dhe Korridorit 10D, ndërsa pres që në Korridorin 10D kilometrat e parë të vihen në funksion vitin e ardhshëm.

Po punohet gjithashtu edhe në interkonektorin e tensionit të lartë, i cili duhet të na lidhë me fqinjin tonë perëndimor. Gjithçka që ka kuptim dhe që mbështetet në këtë strategji të katër shtyllave është vënë në lëvizje, po punohet dhe ne, si Qeveri, vazhdojmë të mbetemi të përqendruar në të gjitha këto projekte.

Indikatorët e parë në aspektin ekonomik tashmë kanë filluar të shfaqen. Ja, pas 27-28 muajsh pune të palodhshme, në kushte kur kishim një shtet të shkatërruar dhe në kushte kur para nesh po ndodhë kriza më e madhe epike që mban mend njerëzimi, ne si Qeveri ia dolëm të shënojmë rezultate që na rendisin ndër vendet e para në Evropë.

Dhe këtu nuk do të tregohem modest, pavarësisht faktit se rrezikoj që një numër i madh politikanësh të opozitës, pas kësaj deklarate, të mos pajtohen dhe të përpiqen të më përqeshin kur flas për fakte që na rendisin ndër pesë vendet e para në Evropë. Megjithatë, unë do të vazhdoj t’i përsëris ato.

Në tremujorin e dytë të këtij viti, të vitit 2026, rritja e Prodhimit të Brendshëm Bruto është 4,3%, dhe është ndër pesë vendet e para në Evropë dhe bindshëm ndër vendet me rritjen më të lartë në rajon, në mos me rritjen më të lartë. Njëkohësisht, është e rëndësishme të theksohet se gjendja në ekonomi është konsoliduar edhe sa i përket inflacionit dhe kostos së jetesës, pasi në tremujorin e tretë inflacioni mesatar në vendin tonë është 2,5%. Në cilindo vend fqinj, qoftë te fqinji ynë jugor, lindor apo perëndimor, do të vëreni se inflacioni mesatar është 5% ose më shumë, ndonëse deri jo shumë kohë më parë na bindnin se inflacioni në vendin tonë ishte dy herë më i lartë se mesatarja e BE-së, me arsyetimin se ishte i importuar.
Ja sot mund të dëshmojmë se, në tremujorin e tretë, inflacioni në vendin tonë është 25% më i ulët se mesatarja e BE-së.
Të shkojmë edhe një hap më tej Enti Shtetëror i Statistikave ka publikuar korrigjimin e rritjes së PBB-së për vitin 2024, nga 3% në 3,8%, gjë që, në vetvete, e ul raportin e borxhit nga 61 në 57,4%.
E kemi ruajtur rejtingun kreditor, sipas të gjitha agjencive ndërkombëtare të besueshme të vlerësimit kreditor, ndonëse në të gjitha vendet e rajonit dhe të Evropës vërehet një tendencë e uljes së vlerësimeve. Vetëm te ne rejtingu mbetet i pandryshuar, me tendencë për të ruajtur stabilitetin dhe për të shënuar rritje.
Sigurimi i teksteve shkollore për nxënësit deri më 1 shtator nuk paraqet më sfidë e as dhënia e dokumenteve personale në Ministrinë e Punëve të Brendshme nuk paraqet më sfidë. Përballimi i zjarreve është bërë rutinë, nëse e krahasojmë me atë që ndodhte në Evropë.
Kështu, treguesit e parë të punës së kësaj Qeverie, ku bëjnë pjesë koalicioni i udhëhequr nga VMRO-DPMNE, partia politike VLEN dhe partia politike ZNAM, dëshmojnë se puna e përkushtuar gjatë këtyre 27–28 muajve ka rezultuar me projekte të shumta dhe me konsolidimin e gjendjes, në kushte kur e gjetëm shtetin të drejtuar drejt greminës dhe kur, në nivel botëror, po përballemi me krizën më të madhe energjetike që kujton njerëzimi.
Falënderoj ekipin e kolegëve nga Qeveria dhe punonjësit e institucioneve. Falënderoj qytetarët për durimin e tyre.
Jam i bindur se sot vendi është një vend shumë më i mirë për të jetuar sesa ishte para tre vjetësh. Gjithashtu, jam i bindur se, përmes punës së përbashkët, të gjithë ne, së bashku me partnerët tanë nga KE, BE dhe NATO-ja, pas tre vjetësh nga sot do të kemi një vend edhe më të mirë për të jetuar sesa ky që kemi sot.
Ju falënderoj edhe një herë për gjithçka që bëni dhe Zoti e bekoftë Maqedoninë!