Zbulohen nëntë migrantë pranë Gjevgjelisë, arrestohen dy të dyshuar për kontrabandë

Nëntë migrantë nga Afganistani dhe Egjipti janë gjetur pranë fshatit Bogorodica, në rajonin e Gjevgjelisë, ndërsa policia ka privuar nga liria dy të dyshuar në lidhje me rastin, njofton Ministria e Punëve të Brendshme.

Më 11 tetor, në orën 16:50, oficerë të policisë kufitare nga stacioni policor kufitar Bogorodica ndaluan dhe kontrolluan një automjet “Skoda” me targa të Shkupit, të drejtuar nga 39-vjeçari B.K. nga Shkupi. Në automjet u gjetën shtatë migrantë – pesë nga Afganistani dhe dy nga Egjipti.

Rreth orës 18:30 u gjetën edhe dy migrantë të tjerë nga Egjipti, të cilët ishin pjesë e së njëjtës grup, por nuk kishin hyrë në automjet në vendin e quajtur “Kravarski pat”.

Për shkak të dyshimit për kryerjen e veprës penale sipas nenit 418-B të Kodit Penal, më 12 tetor në orën 00:05 u privua nga liria edhe një 17-vjeçar nga Egjipti me qëndrim të përkohshëm në Greqi.

Migrantët u akomoduan në Qendrën e Pranimit dhe Transitit në Gjevgjeli, ndërsa dy të dyshuarit u mbajtën në stacionin e policisë. Pas dokumentimit të plotë të rastit, Ministria e Punëve të Brendshme njofton se do të paraqitet kallëzim përkatës.