‘Zbulohet’ lista e lojtarëve më të paguar në botë, Ronaldo fiton dy herë më shumë se Messi

Një raport i publikuar të martën ka zbuluar listën e futbollistëve më të paguar në botë, ku përfshihet vetëm një yll arab.

Gazeta “The Sun” raportoi se Cristiano Ronaldo fiton më shumë se dyfishin e shumës që përfiton rivali i tij i përjetshëm, Lionel Messi, pas publikimit të listës së futbollistëve më të paguar në botë.

Ylli i Al-Nassr fiton rreth 488 mijë funte në ditë falë kontratës së tij të majme me klubin saudit. Kjo e rendit atë në krye të listës.

Sipas listës së “Forbes”, të ardhurat e Ronaldos vlerësohen në rreth 225 milionë funte (300 milionë dollarë) brenda një sezoni të vetëm.

Kjo shumë ndahet në rreth 187 milionë funte (250 milionë dollarë) nga Al-Nassr dhe afërsisht 37 milionë funte (50 milionë dollarë) nga marrëveshjet e tij komerciale.

Paga marramendëse e portugezit është më shumë se dyfishi i asaj të Messit, i cili fiton rreth 108 milionë funte (145 milionë dollarë) brenda një sezoni.

Kontrata e Messit me Inter Miamin në Major League Soccer i siguron atij afro 52 milionë funte në vit (70 milionë dollarë), ndërsa marrëveshjet e sponsorizimit i sjellin edhe 56 milionë funte (75 milionë dollarë) në vit.

Pasi kanë rivalizuar për titullin e futbollistit më të mirë në botë për më shumë se një dekadë, Ronaldo dhe Messi përfitojnë së bashku pothuajse gjysmën e 706 milionë funteve që fitojnë futbollistët më të paguar në total.

Ylli i Real Madridit, Kylian Mbappe, renditet i treti, me të ardhura vjetore prej rreth 75 milionë funtesh, pasi i dha fund kontratës me “Nike”, e cila vlente 15 milionë funte (20 milionë dollarë) në vit.

Sulmuesi i Manchester Cityt, Erling Haaland, zë vendin e katërt me 64 milionë funte (84 milionë dollarë), falë edhe partneriteteve me kompani të tjera.

Pesëshen e parë e plotëson Vinicius Junior i Real Madridit, i cili fiton rreth 56 milionë funte (76 milionë dollarë) në vit, pas nënshkrimit të kontratës së re me klubin, me vlerë 25 milionë funte (33 milionë dollarë) për një sezon.

Edhe kontrata e re dhe e majme që Lamine Yamal nënshkroi me Barcelonën vitin e kaluar e ka futur atë në listë, duke e renditur në vendin e gjashtë.

Adoleshenti fiton rreth 41 milionë funte (55 milionë dollarë) në vit, pas marrëveshjes me vlerë 33.5 milionë funte (45 milionë dollarë) për një sezon me gjigantin katalunas.

Në listë përfshihen edhe sulmuesi i Al-Nassr dhe ish-ylli i Liverpoolit, Sadio Mane, me 40 milionë funte (54 milionë dollarë), si dhe Jude Bellingham, me 34 milionë funte (45 milionë dollarë).

Kapiteni i Anglisë dhe sulmuesi i Bayern Munichut, Harry Kane, renditet i nënti, duke u shfaqur për herë të parë në këtë listë.

Kane përfiton rreth 32 milionë funte në vit, falë kontratës me klubin gjerman, që i siguron 400 mijë funte në javë, si dhe marrëveshjeve me kompani të ndryshme.

Ish-legjenda e Liverpoolit, Mohamed Salah, e plotëson dhjetëshen e parë me pagë vjetore prej 30 milionë funtesh, pasi nënshkroi një kontratë fitimprurëse dyvjeçare me Trabzonsporin, me vlerë 363 mijë funte në javë.

Salah u largua nga “Anfield” verën e kaluar, duke bërë që Haaland të mbetet përfaqësuesi i vetëm i Premierligës në këtë listë.

Megjithatë, Bellingham dhe Kane bëjnë që Mbretëria e Bashkuar të ketë dy futbollistë në dhjetëshen e parë për herë të parë që nga viti 2013, kur në listë ishin Wayne Rooney dhe David Beckham.

Mungesa më e madhe në listë është ajo e ish-yllit të Real Madridit, Karim Benzema.

Sulmuesi i njohur fitoi 78 milionë funte (104 milionë dollarë) sezonin e kaluar, përpara se t’i përfundonte kontrata me Al-Hilalin. Aktualisht, ai është lojtar i lirë.