Fitore e madhe e Bayernit në udhëtim te Freiburgu, rikthehet në krye të tabelës

Bayern Munichu u rikthye në krye të tabelës së Bundesligës me fitoren 3-1 ndaj Freiburgut në “Europa-Park Stadion”, duke e zgjatur serinë pa humbje në përballjet direkte në Bundesligë në 21 ndeshje (17 fitore, katër barazime).

Përgatitjet për këtë ndeshje u dominuan nga lajmi se trajneri i Bayern Munichut, Vincent Kompany, ishte dërguar në spital pasi ishte rrëzuar në qendrën stërvitore të premten.

Klubi më pas konfirmoi se stafi i tij teknik do t’i mbikëqyrë aktivitetet e ekipit të parë, derisa trajnerit belg t’i jepet koha dhe mbështetja e nevojshme për t’u rikuperuar.

Me Bayernin që synonte t’i përgjigjej fitores së Borussia Dortmundit ndaj Eintracht Frankfurtit, ndihmëstrajneri Aaron Danks nuk mund të kishte kërkuar një fillim më të mirë, pasi Dayot Upamecano e nisi dhe e përfundoi një kundërsulm të shpejtë për ta kaluar skuadrën në epërsi në minutën e 16-të.

Pasi bllokoi një goditje në hyrje të zonës, Upamecano vazhdoi vrapimin, ndërsa topi u dërgua te Michael Olise, i cili e shërbeu mbrojtësin përballë portës dhe ai shënoi me qetësi në këndin e poshtëm.

Mio Backhaus e pengoi Nathaniel Brownin ta dyfishonte epërsinë pak pas minutës së 30-të, por nuk mundi të bënte asgjë për ta ndalur goditjen e Serge Gnabryt në minutat e fundit të pjesës së parë.

Sulmuesi depërtoi prapa mbrojtjes për ta pranuar pasimin depërtues të Brownit dhe, me qetësi, e dërgoi topin ulët pranë portierit, duke bërë që mysafirët të shkonin në pushim me epërsi të konsiderueshme.

Në kërkim të frymëzimit, trajneri i Freiburgut, Julian Schuster, bëri dy zëvendësime pak para minutës së 60-të, përfshirë inkuadrimin e Igor Matanovicit, i cili rrezikoi të linte menjëherë gjurmë, kur goditja e tij ambicioze nga distanca e detyroi Jonas Urbigin të bënte një pritje të rrallë.

Megjithatë, portieri i Bayernit u mposht në minutën e 82-të, kur Tom Bischof, në përpjekje për ta bllokuar një harkim të rrezikshëm, e devijoi pa dashje topin në rrjetën e portës së tij.

Ky gol krijoi kushtet për një fund emocionues të ndeshjes, gjatë të cilit Sacha Boey shënoi një gol që u anulua, ndërsa Urbig bëri një pritje të shkëlqyer refleksive pas goditjes me kokë të Matthias Ginterit.

Pak më vonë, Olise e vulosi rezultatin, duke e dërguar topin në portën e zbrazët me një goditje nga distanca, pasi Backhaus u kap me topin në këmbë larg portës, në një pozitë të pafavorshme.

Kjo fitore bën që Bayerni të hyjë në Der Klassiker ndaj Dortmundit në krye të tabelës, me gol-dallim më të mirë, ndërsa Freiburgu mbetet katër pikë prapa, në vendin e katërt.