Arrestime në kreun e policisë serbe, pas Kriçakut në pranga edhe një drejtor tjetër i lartë

Sipas informacioneve të agjencisë “Tanjug”, privimi i tyre nga liria lidhet drejtpërdrejt me veprime të paligjshme dhe brutalitet të rëndë policor në rastin “Senjak”.

Me urdhër të Prokurorisë së Lartë Publike në Beograd, u arrestuan shefi i Drejtorisë së Policisë Kriminalistike (UKP) Marko Kriçak dhe shefi i Shërbimit për Luftën kundër Krimit Boško Sekuloviq. Aksioni u krye nga Shërbimi për Luftën kundër Korrupsionit me dyshim për abuzim të pozitës zyrtare.

Sipas Tanjugut, privimi i tyre nga liria lidhet drejtpërdrejt me procedurat e paligjshme dhe brutalitetin e rëndë policor në rastin “Senjak”. Bëhet fjalë për hetimin e vrasjes së Aleksandar Nešović Bajo, që ndodhi më 12 maj në restorantin “27” në Senjak. Shefat e arrestuar akuzohen për rrahjen e disa prej të dyshuarve në stacionin e policisë gjatë dëgjesës së tyre.

Rasti i vrasjes së Nešovićut që nga fillimi është shoqëruar me një sërë paqartësish se kush ka qëndruar në restorant në momentin e krimit dhe cilët persona kanë ndihmuar në heqjen e provave materiale dhe fshehjen e trupit. Për vrasje të rëndë në këtë çështje është akuzuar Saša Vuković, ndërsa procedura përfshin edhe miqtë e tij dhe punonjësit e restorantit që kanë ndihmuar në mbulimin e krimit. Në denoncimin fillestar policor për këtë krim ishte përfshirë edhe Veselin Milić, atëherë shef i policisë së Beogradit dhe ndihmës-drejtor.

Prokuroria e Lartë Publike në Beograd kishte konfirmuar më parë se procesverbalet me deklaratat e katër të dyshuarve, të cilët pretendonin se ishin rrahur brutalisht nga policia, u dërguan te prokuroria kompetente për shkak të dyshimit për veprën penale të keqtrajtimit dhe torturës.

Marko Kriçak mori detyrën e shefit të UKP-së më 30 dhjetor 2025 dhe qëndroi aty pak më shumë se një vit. Para kësaj, ai drejtonte Njësinë për Mbrojtjen e Personave dhe Objekteve (JZO). Karrierën e nisi në Agjencinë e Informacionit të Sigurisë (BIA), pastaj punoi në Departamentin për Luftën kundër Drogës brenda SBPK-së.

Kriçak njihet nga publiku i gjerë edhe për shkak të akuzave të studentës Nikolina Sinđelić, e cila ngriti denoncim penal kundër tij për kërcënime dhe brutalitet policor në ndërtesën e garazhit të Qeverisë së Serbisë gjatë protestave të vitit të kaluar.