Zbulim tronditës në Spanjë/ Gjendet trupi i një foshnje të porsalindur në frigorifer, dyshohet se kishte mbi 20 vite aty

Një zbulim makabër ka tronditur qytetin e Alarizit, në provincën e Orenses në Spanjë, ku trupi i një foshnje të porsalindur është gjetur brenda një frigoriferi në një ambient magazinimi të një pallati.

Ngjarja u zbulua rastësisht nga një grua, e cila pas vdekjes së nënës së saj kishte nisur të sistemonte sendet personale dhe pronën e familjes. Gjatë kontrollit në një magazinë pranë garazhit të pallatit, ajo gjeti trupin e foshnjës brenda frigoriferit dhe njoftoi autoritetet.

Sipas raportimeve të mediave, vlerësimet paraprake mjekësore tregojnë se foshnja kishte lindur pas një shtatzënie prej rreth 32 deri në 34 javësh. Hetuesit po shqyrtojnë mundësinë që trupi të ketë qëndruar në frigorifer për më shumë se dy dekada.

Për të përcaktuar kohën dhe rrethanat e sakta të vdekjes, autoritetet kanë urdhëruar kryerjen e autopsisë dhe ekzaminimeve të specializuara mjekoligjore. Gjithashtu, janë marrë mostra ADN-je, të cilat pritet të ndihmojnë në identifikimin e prindërve biologjikë të foshnjës.

Një nga pistat që po shqyrtohet është edhe mundësia që foshnja të ketë humbur jetën në një zonë tjetër të provincës dhe trupi të jetë transportuar më pas drejt Alarizit.

Deri më tani, autoritetet nuk kanë dhënë detaje për identitetin e personave të përfshirë apo rrethanat e ngjarjes. Dosja hetimore i është përcjellë tashmë autoriteteve gjyqësore, ndërsa priten rezultatet përfundimtare të ekspertizave për të hedhur dritë mbi këtë rast.