Zelensky thotë se SHBA a ka hedhur në tavolinë idenë e anëtarësimit në NATO në këmbim të heqjes dorë nga Donbasi

Negociatorët amerikanë kanë hedhur si mundësi tërheqjen e forcave të mbetura ukrainase nga rajoni lindor i Donbasit, në këmbim të anëtarësimit të Ukrainës në NATO. Kështu ka deklaruar presidenti ukrainas, Volodymyr Zelensky, shkruan BBC.

Deklarata e Zelenskyt, të shtunën, vjen pas vizitës së të dërguarve amerikanë në Moskë dhe pjesëmarrjes në një samit të BE-së në Dublin, në kuadër të përpjekjeve të vazhdueshme për t’i dhënë fund luftës mes Rusisë dhe Ukrainës.

Kievi prej kohësh e ka kërkuar anëtarësimin në NATO si një nga kushtet për arritjen e një marrëveshjeje paqeje, me qëllim garantimin e sigurisë dhe parandalimin e kërcënimeve të ardhshme. Ndërkaq, Rusia ka deklaruar se nuk mund të pranojë anëtarësimin e Ukrainës në aleancën ushtarake, duke e konsideruar të papranueshme praninë e një tjetër vendi të NATO-s në kufijtë e saj

Zelensky ka përsëritur vazhdimisht se Ukraina nuk është e gatshme të heqë dorë nga territoret e saj sovrane, pavarësisht kërkesave të Moskës për t’ia dorëzuar Donbasin.

“Amerikanët ngritën një pyetje: ‘Po nëse Ukraina anëtarësohet në NATO? A do të tërhiqej Ukraina nga Donbasi?’ Kjo ishte hera e parë që u ngrit një çështje e tillë”, u tha Zelensky gazetarëve të shtunën.

Ai shtoi se nëse do të merrte një propozim që përfshin garanci të sigurisë, mungesë të kufizimeve për ushtrinë ukrainase dhe fonde për rindërtimin e vendit, do ta dërgonte atë për votim në referendum.

Të dërguarit amerikanë Jared Kushner dhe Steve Witkoff udhëtuan të enjten drejt kryeqytetit irlandez për t’u takuar me Zelenskyn, pas një raundi bisedimesh me presidentin rus, Vladimir Putin, në Moskë.

Deklaratat e Putinit dhe zyrtarëve të Kremlinit sugjerojnë se qëndrimi i Rusisë për luftën nuk ka ndryshuar. Kërkesat e Moskës për territore dhe neutralitetin e Ukrainës vazhdojnë të jenë shumë më të mëdha sesa ato që Kievi është i gatshëm të pranojë.

Më herët, Moska kishte propozuar kufizimin e madhësisë së ushtrisë ukrainase, lëshime territoriale dhe garantimin e neutralitetit të Kievit si kushte për një marrëveshje paqeje.

Ukraina i ka refuzuar këto kërkesa, duke argumentuar se kufizime të tilla do ta dobësonin aftësinë e saj për t’u mbrojtur nga një pushtim i mundshëm në të ardhmen.

Megjithatë, së fundmi janë shfaqur disa shenja se palët mund të gjejnë pika të përbashkëta. Muajin e kaluar, Melania Trump, bashkëshortja e presidentit amerikan Donald Trump, arriti të ndërmjetësonte një armëpushim të përkohshëm në rajonin e Hersonit, me qëllim mundësimin e evakuimeve dhe dërgimin e ndihmave humanitare.