Mehdi Benatia zbulon kërkesën e ‘çuditshme’ të Ronaldos, pas transferimit te Juventusi

Medhi Benatia ka zbuluar se si mospëlqimi i Cristiano Ronaldos për grumbullimet para ndeshjeve kishte sjellë një bisedë me Massimiliano Allegrin gjatë kohës kur të dy ishin pjesë e Juventusit.

Ish-mbrojtësi i Marokut e ka rrëfyer këtë histori për “Canal+”, me deklarata të publikuara nga “Calciomercato.com”.

Klubet italiane tradicionalisht i mbajnë futbollistët së bashku në një hotel ose në qendrën stërvitore një natë para ndeshjeve.

Kjo praktikë njihet si “ritiro”, ndërsa Ronaldo e pati të vështirë të përshtatej me të pas transferimit nga Real Madrid në vitin 2018.

“Në vitin 2018 erdhi Cristiano Ronaldo dhe atij nuk i pëlqente shumë grumbullimi, sepse nuk ishte mësuar me të. Më tha: ‘A nuk ka ndonjë mënyrë që të bisedojmë pak me italianët, me trajnerin?’. Unë iu përgjigja: ‘Po, sigurisht, do të provojmë’”, rrëfeu Benatia.

“Pastaj shkova te Chiellini dhe i thashë: ‘Gio, kemi një bashkëlojtar që nuk e pëlqen shumë grumbullimin dhe gjithçka që lidhet me të’. Ai më pyeti: ‘Pse? A ta ka thënë këtë?’. I thashë: ‘Po, më është drejtuar mua’”, vazhdoi ai.

Benatia tregoi se më pas, së bashku me Giorgio Chiellinin, kishin shkuar për të biseduar me trajnerin e atëhershëm, Massimiliano Allegri.

“Shkuam të flisnim me trajnerin, Allegrin në atë kohë, së bashku me Chiellinin: ‘Mister, janë tre apo katër lojtarë, sidomos futbollistët kryesorë, që do të preferonin të mos qëndronin në grumbullim, nëse është e mundur’.

Trajneri u përgjigj: ‘Kush dëshiron të shkojë në grumbullim, shkon. Kush nuk dëshiron, nuk shkon’”, zbuloi Benatia.

Benatia kaloi dy vjet e gjysmë te Juventusi, nga viti 2016 deri në janar të vitit 2019, duke fituar dy tituj të Serie A, dy Kupa të Italisë dhe një Superkupë të Italisë.

Ai ishte transferuar te Juventusi nga Bayern Munichu, ku nuk kishte arritur të gjente veten.

“Dëshiroja të largohesha pas vitit të parë, prandaj kërkova të më lejonin të largohesha. Doja të kthehesha në Itali. Juventusi, Interi dhe disa klube të tjera ishin të interesuara”, shpjegoi ai.

“Pas dy muajsh në Gjermani, i thashë gruas sime: ‘Dëgjo, nuk e di nëse kam bërë zgjedhjen e duhur këtu. Nuk ndihem rehat. Italia është shtëpia ime e dytë’.

Kështu u ktheva dhe iu bashkova Juventusit. Pikërisht atëherë e kupton se sa të rëndësishme janë kultura e punës dhe disiplina”, përfundoi Benatia.