Bora ende nuk ka mbuluar Kodrën e Diellit, por ski-qendra po bëhet gati për sezonin e ri dimëror. Kontrollet teknike, ndërhyrjet në pistat e skijimit dhe përmirësimi i infrastrukturës janë drejt përfundimit. Ndërkohë, për vizitorët këtë sezon parashikohen edhe një pistë e re skijimi gjatë natës dhe një ashensor i ri për fëmijë, ndërsa mungesa e parkingjeve vazhdon të mbetet problem.

“Siç e dini, jemi në përfundim të përgatitjeve për sezonin e skijimit. Kemi bërë edhe incizimin e linjave nga Fakulteti i Makinerisë, si dhe intervenime në disa linja. Konkretisht, në ‘GE’ kemi bërë edhe ndërrimin e linjës me të re. Sa i përket kontrollit nga fakulteti, gjithçka është në rregull dhe presim të marrim lejen e punës”, tha Drejtori i Kodrës së Diellit, Gani Aliji.

Përveç ndërhyrjeve në pistat ekzistuese, këtë sezon skijatorët do të kenë mundësi të shfrytëzojnë edhe pistën “GE” gjatë natës, e cila do të pajiset me ndriçim. Për më të vegjlit, në ski-qendër pritet të instalohet një ashensor i ri, rreth 100 metra i gjatë, i cili aktualisht është në prodhim dhe pritet të arrijë në Kodrën e Diellit deri në fund të muajit.

“Kemi pasur disa probleme me rrjetin e ujërave nën ulësen e gjashtë, por kemi bërë projektin dhe gjithçka është rregulluar. Gjithashtu, kemi bërë ndryshimin e linjës optike në Kodrën e Diellit, si dhe ndërrimin e hyrje-daljeve për skijatorët, të cilat ishin më të vjetra se dhjetë vjet. Kemi bërë përgatitjet edhe për ‘Land Lift’-in për fëmijë, prej 100 metrash. E presim gjatë këtij muaji, pasi është në prodhim dhe në fund të muajit arrin në ski-qendër”, u shpreh Aliji.

Por, edhe këtë dimër, një nga shqetësimet kryesore për vizitorët pritet të jetë parkimi. Në ditët e fundjavës, fluksi i madh i automjeteve vështirëson qarkullimin dhe gjetjen e vendeve të lira. Qarkorja që po ndërtohet pritet të lehtësojë qarkullimin dhe të krijojë hapësira shtesë për parkingje, por mbetet të shihet nëse do të jetë funksionale gjatë sezonit dimëror.

Ne përdorim cookies për të përmirësuar përvojën tuaj dhe për të analizuar trafikun në faqe. Duke vazhduar përdorimin e faqes, ju pranoni përdorimin e cookies sipas Politikës së Privatësisë. Pranoj Me shume