Kurti “as s’e llogarit” deklaratën e Presidencës së Kosovës për incidentin e Osmanit në aeroportin e Shkupit

“Situata e djeshme në Aeroportin e Shkupit nuk mund të shpjegohet e as të vlerësohet ndryshe, përveçse si një provokim i pastër dhe tendencë për të shkaktuar incident”, ishte një pjesë e deklaratës së Presidencës së Republikës së Kosovës në ditën kur dhe ndodhi incidenti me të parën e shtetit në aeroportin e Shkupit, shkruan Gazeta Online Reporteri.net.

Për dallim nga ky institucion shtetëror, Kryeministri Albin Kurti, gjatë vizitës së tij sot në Maqedoninë e Veriut, ku dhe u pyet për incidentin e Presidentes Osmani, ai deklaroi se institucionet e Kosovës se kanë quajtur provokim atë që ka ndodhur.

Kreu i ekzekutivit kosovar, në pyetjen e drejtuar nga një gazetar “Nëse e sheh si provokim rastin, ashtu siç ka deklaruar Kosova”, Kurti tha se një gjë të tillë mund të kenë thënë vetëm qytetarët, por s’është qëndrim i institucioneve të Republikës së Kosovës.

“Nuk e di që kemi pasur qëndrim të tillë si institucione se ka qenë provokim, mund ta ketë thënë dikush prej qytetarëve, por jo institucionet e Republikës së Kosovës. Ministria e Punëve të Jashthme dhe Diasporës ka dhënë qëndrimin e saj që është qëndrim i Republikës së Kosovës, po ashtu kemi parë edhe qëndrimin e MPJ-së së Maqedonisë së Veriut. Besoj se duhet të synojmë të vërtetën dhe assesi tensionimin. Pra le të zbardhet rasti, janë institucionet që e bëjnë këtë. Ne s’mund të bëjmë edhe zyrtarin doganor, edhe zyrtarin policor edhe atë që mbikëqyr sigurimin e aeroportit. Po bëhemi ngadalë, por sigurt, ekspertë të shumë detajeve teknike, por besoj që sa i përket thelbit të gjësë jemi përgjigjur dhe masat po ndërmerren”, ishte deklarata e Kurti në konferencën e përbashkët me Kryeministrin e RMV-së, lidhur me incidentin e së enjtes në aeroportin e Shkupit.

Sipas Kurtit, do të ketë një raport në tërësi dhe të hollësishëm lidhur me rastin.

Por, pavarësisht kësaj, kryeministri kosovar deklaroi se as ai vet, por edhe kryeministri i Maqedonisë së Veriut, s’mund të bëjnë edhe mbikëqyrësin e sigurimit të aeroportit.

“As unë as kryeministri i Republikës së Maqedonisë së Veriut s’mund të bëjmë edhe zyrtarin doganor, edhe zyrtarin policor edhe atë që mbikëqyr sigurimin e aeroportit”, tha mes tjerash Kurti.

Të enjten e 1 gushtit, Presidentja e Republikës së Kosovës Vjosa Osmani është përballur me një incident diplomatik në Aeroportin e Shkupit, ku sigurimi i aeroportit ka tentuar t’ia marrë telefonin, në kundërshtim me rregullat ndërkombëtare për marrëdhënie diplomatike.