Aksident në rrugën Kllokot – Viti, vdes pasagjeri

Ka vdekur pasagjeri i një automjeti i cili u vetaksidentua në aksin rrugor Kllokot – Viti, mesnatën e së enjtes.

Zëdhënësi i policisë për rajonin e Gjilanit Ismet Hashani, për Klankosova.tv tha se dyshohet se automjeti ka dalë jashtë rrugës dhe është rrotulluar.

Ai tutje tregoi se vdekja e pasagjerit është konstatuar nga mjeku, në vendin e ngjarjes.

Hashani tha se ngasësi i automjetit ka pësuar lëndime dhe se po trajtohet në Spitalin Rajonal në Gjilan, njofton Klankosova.tv.

“Trupi i pajetë i viktimës me urdhër të Prokurorit të Shtetit është dërguar në Institutin e Mjekësisë Ligjore për obduksion, ndërsa vozitësi do të dërgohet në mbajtje”, shtoi ai.